Lehkhabu bawm : Lalhmingmawii Rawihte ziah 'Kan Fate Tan' tlangzarh

Lalhmingmawiii Rawihte ziah 'Kan Fate Tan' tih lehkhabu chu nimin khan minister Lalruatkima'n Aizawl Press Club-ah a tlangzarh.

Lehkhabu tlangzarh inkhawm hi Hmingchungnunga'n a kaihruai a; UPC (NEI) general treasurer Rev. Lalmalsawma Sailo in hunserh a hman bakah, K Lalremruata, advocate chuan a review a ni.

'Kan Fate Tan' tih lehkhabuah hian thupui 12 a awm a, heng zinga 11 chu Bible leh Mizo thawnthua mi hmingthangte chanchin hmanga naupangte nundan kawng dik zirtirna a ni a, bung 12-naah hian Lalhmingmawii Rawihte hlaphuah hrang hrang dahkhawm a ni thung.

Minister Lalruatkima chuan, ziaka chhiar theih tura thil dah a pawimawh thu a sawi a, "Hun lo kal zel turah pawh Mizo ṭhalai, ṭhangtharte hian mahni kutchhuak ngei hi nasa zawkin kan la hlut tulh tulh dawn a, chumi hunah chuan heng kan ziaktu thiam leh lar tak takte kutchhuak hi tun aia nasa zawk hian khawvel hmun hrang hrangah hnam dangte hmuh leh chhiar theih tur pawhin kan la pho chhuak ngeiin ka ring," a ti.

Mi thiamte sawi ṭhin pakhat chu, 'Naupang hian a nu leh pate a zir ngai lo a, a entawn ṭhin' tih a nih thu sawiin Lalruatkima chuan, "Thua zirtir ai chuan nuna zirtir hian awmzia a nei zawk tihna a ni. Nu leh pate zuk leh hmuama kan fihlim loh chuan kan fate hi fihlim turin kan beisei thei lo ang," a ti a; thu ṭha tak tak Mizo ṭawng ngeia chhiar tura awmte hi hlut thiam a, hnam rohlu tak a ni tih hre reng turin Mizo mipuite a ngen bawk.