Ryan Reynold-a'n USD tld 1.35-in a company hralh

Lemchanthiam hmingthang tak, Ryan Reynolds chu mi hausa tawntaw, Billionaire a ni thuai dawn. Hei hi a lemchanthiam vang lam ai mahin a wireless company, Mint Mobile chu T-Mobile hnenah USD tld 1.35 zeta a hralh vang a ni.

Ryan leh T-mobile-te chuan nimin khan inremna an siam theih thu thuchhuah inṭawm an siam a, "Mint Mobile hi wireless zingah hei aia ṭha thlan tur dang a awm chuang bik lo a, vawiina kan inremna hmang hian customer huamzau zawk leh product ṭha zawk kan neih phah dawn a ni," tiin Ryan chuan a sawi.

Reynolds chuan, "Wireless company ka nei ang tih ka ring pha ngai lo a, T-Mobile hi ka rilruah a lang phak ngai lo. Hringnun hi a mak a, ka tan hun ṭha leh chhinchhiahthlak tak a nih avangin thinlung takin ka lawm a ni," a ti.

Reynolds leh a thawhpui, David Glickman leh Rizwan Kassim-te chuan kum 2016 khan Mint Mobile hi an din a ni. T-Mobile chuan an inremna USD tld 1.35 zinga 39% chu sum faiin an pe ang a, a bak 61% chu stock kaltlanga siamrem a ni thung ang.

T-Mobile chuan Reynolds leh co-founder-te chu Ka'ena Corporation brand hnuaiah an la thawk chhunzawm dawn a ni.