Star Wars aiin Indopui I-na a pui zawk
Box Office-ah roreltu thar a awm a, chu chu Indopui I-na hunlai behchhana siam '1917' a ni. Hunrei tak sum lalut hnem ber dinhmun luahtu Star Wars: The Rise Of Skywalker chuan a dinhmun a luahlum zo ta lo a, pahnihna a ni thung. Jumanji: The Next Level chu sum lalut pathumna a ni ve bawk.
1917-ah khawvel mipui an let
Chart hmasaah khan a lang a, mahse mi tam tak chuan a lang phak tih pawh an hre lo mai thei. A chhan chu 17-naah daih a awm vang a ni, Top 20-ah a lang phak ṭawk.
January 5 khan 77th Golden Globe Awards sem a ni a, Box Office top 10-ah pawh lang pha lo film 1917 chuan Best Motion Picture – Drama leh Best Director a rawn la nawlh mai. Chumai a ni lo, 73rd British Academy Film Awards nomination list tihchhuahah nomination pakua a hmu ṭhawt bawk. Film lam tuipuitute'n 1917 lam an hawi ṭan a, US-ah chuan Nikum Krismas ni tak khan tlangzarh tawh mah se, Zirtawpni liam ta khan United Kingdom-ah tlangzarh a ni ve leh chiah a, chart hmasaa 17-na a awm pha ṭawk kha tlangzarh a nih aṭanga kar thum a liam meuh chuan sum lalut tam ber a rawn ni leh ta a ni.
Film lama award ngaihhlut ber Oscar awards-ah pawh nomination 10 a hmu thei a, a hmuhnawm tih a chiang. Tlangzarh a nih kar leh, a dawt karah khan theatre 11-ah chiah tihchhuah a ni hrim hrim a, theatre 17 a tihchhuah a nichunga 17-na a ni phak erawh hi chu thil namai lo tak a ni tho.
Kar tawp liam taah kha chuan theatre 3,434-ah tihchhuah a ni ta a, $37,000,200 zet lalutin hunrei tak sum lalut hnem ber dinhmun luahtu Star Wars: The Rise Of Skywalker a nekchhuak ta a ni.
He film-ah hian George MacKay leh Dean-Charles Chapman-te an chang a, Benedict Cumberbatch pawh a inlan bawk.
Star Wars leh Jumanji an la ropui
Star Wars: The Rise Of Skywalker chu pahnihnaah tlahniam ve bawk mah se $15,187,034 zet a la lalut thei. December 20-a tlangzarh daih tawh kha a ni a, a hlawhtling rem rem bawka tunkar chhung hian $tld a lalut hman ngei tura chhut a ni. Tunah hian khawvel pumah $mtd 996.6 a lalut tawh. Jumanji: The Next Level pawh pathumnaah a la lang phak bawk a, $14,005,131 lai a la lalut thei a ni.
Film thar
Top 10 chinah film thar pahnih lang a awm a, American comedy film Like a Boss chu palina niin, Underwater chu pasarihna a ni bawk.
1917 bakah hian chart-a nasa taka rawn invawrh dang a awm a, chu chu Just Mercy a ni. He film hi chart hmasaah khan 30-na a ni a, kar tawpah khan panganaah a rawn inhlangkai a ni.
Box Office Top 10
1 1917 $mtd 37
2 Star Wars: The Rise Of Skywalker $mtd 15
3 Jumanji: The Next Level $mtd 14
4 Like a Boss $mtd 10
5 Just Mercy $mtd 9
6 Little Women $mtd 7.8
7 Underwater $mtd 7
8 Frozen II $mtd 5.9
9 Knives Out $mtd 5.6
10 Spies in Disguise $mtd 5.1