Khiangte Construction Ṭhazual Gospel ; Maruat-i'n "Rimawi tak tak" hmangin chart chung ber a luah

Khiangte Construction Ṭhazual Gospel chart thar berah Maruati khum thei an awm lo a, a music video thar "Rimawi tak tak" hmangin chart chung ber a rawn luah leh ta!

Hla thua cheng ṭhin Maruati

Maruati hian Lusei ṭawng hla a sak thiam zia kan hre tawh a, Hmar hla pawh mawi takin a rawn sa chhuak leh thei hian zaithiam danglam tak a nih zia a rawn tilang leh a ni. Gospel hla ṭha tak tak a nei nual tawh a, a hla sak apiangah a rilru a hlan a, a hla sak leh a hla thuah a cheng ṭhin em avangin eng hla pawh sa se; nung takin a sa chhuak thei zel hi a fakawm hle a ni.

Sawi tawh angin, "Rimawi tak tak" hi hmar hla niin, Solomon V Hmar phuah a ni. Music lamah Ephraim Malsawma kuthnu mawi tak hmu bawk a, Recording hi HC Recording-ah tih a ni.

Amosa Vocal Point leh Rebecca tan hun ṭha

Male voice ṭhangduang berte zinga mi, acoustic music mawi tak hmanga hla ṭha bik hlui ṭhintu Amosa Vocal Point hla "Nangchu Pathian pangngai reng" chu pahnihnaah awmin, Mizote'n Male Voice mumal tak kan neih loh hnuah anni an rawn invawrh chho zel hi a lawmawm hle a ni. Kum liam taa 'Chin New Artist of the Year' atana thlan Rebecca Fanai chuan "Min zirtir ang che" tih hla hmangin top 3 a rawn chuangkai bawk.

Chart a lang dangte

Chart hmasa lama pakhatna Lalthansangi chu paihthlakin awm mah se, a hla dang "Misual ka ni Lalpa min ngaidam rawh" hmangin palinaah a rawn invawrh chho a; Vri Pautu & Kimkima Khiangte ft Murfelo hla thar "Hmangaihtu i ni si" chu panganaah a rawn inhlangkai bawk a ni.

Anni bakah hian, Puipuia Chhakchhuak, Christina Vanlalnghaki, Angaiha Fanai, Ruth G leh One in Christ-te an rawn lang bawk.