March 31-ah "Flower" hmangin Jisoo a rawn parchhuak dawn

Blackpink member, Jisoo chuan a solo album hmasa ber tur "ME" tih chu tlangzarh mai theih turin a peihfel thawkhat ta a; album a tihchhuah hmain a solo debut "Flower" chu March 31 hian a tichhuak hmasa phawt dawn tih a puang a, hemi rual hian a official title poster chu social media lamah a phochhuak nghal bawk a ni.

YG Entertainment chuan kumin February thla khan Jisoo-i'n mimal angin hla a tihchhuah tur thu hi an lo puang tawh a, nikum khan Blackpink full-length album pahnihna, Born Pink tichhuak bawkin, a hlawhtling rem rem hle. Kum li hnuah Coachella Valley Music leh Art Festival-te headline turin an inpuahchah mek bawk.

Jisoo hi Blackpink member zinga solo album tichhuak hnuhnung ber a ni. A bandmate Lisa leh Rose te'n kum 2021 khan an solo debut hi an lo tlangzarh tawh a, Jennie erawhin kum 2018 khan a solo debut hi a lo tichhuak tawh bawk a ni.