Tyga-a'n Avril tan USD 80,000 man diamond ṭhi leisak

American rapper, Tyga chuan a kawppui thar Avril Lavigne nen an inkar chu a la thutak chho hle a, kar liam ta khan a kawppui thar tan diamond ṭhi 'Avril' tih chuanna chu USD 80,000 zetin a leisak!

New York khawpuia hmunpui nei celebrity jeweler, leh he ṭhi siamtu ni bawk Eric Mavani chuan he ṭhi ah hian black diamond, white diamond leh pink sapphire carat 50 zet an phum tih sawiin, luruh lem leh "Avril Lavigne tana siam" tih a chuang bawk a ni.

Avril pawhin a thilpek dawn hi a chhuang hle a, Los Angeles-a an chhuahnaah mipui hmuh theiha awrh lang nghal chatin, social media lamah pawh a pholang bawk a ni.

Avril leh Mod Sun an inṭhen thu official-a puanzar a nih hnuah, Tyga hian kar thum liam ta khan Mavani hnenah diamond ṭhi siam turin a ngen nghal vat a, hemi chhung hian an pahnih hian an chhuak dun fo bawk.

Lavigne leh Tyga te hi Paris Fashion Week bakah, event eng emaw zatah an inlan dun tawh a, an inzui hma pawh hian vawi duai lo an inhmu tawh niin khawthlang media-te chuan an tarlang.