Shazam a 'wow' tawk lo!

DC Comics character 'Shazam' film chhunzawmna "Shazam! Fury of the Gods" chu Box office-ah kar liam ta chhunga sum thawkchhuak hnem ber a ni chungin, theatre 4,071 aṭangin USD mtd 30 vel chauh a lakluh avangin beisei erawh a phak lo hle thung.

Kar hmasa lama pakhatna "Scream VI" paihthla turin Shazam erawh a ṭha tawk a, he film chhunzawmna hian USD mtd 40 vel lalut tura beisei ni mah se, kum 2019-a tihchhuah Shazam khan tlangzarh karah USD mtd 53.5 lai a lakluh theih avangin film siamtute rilru aṭang chuan tlakhniamna nasa tak a ni.

DC film zinga bul ṭan chhe pawl

"Fury of the Gods" hi US bikah DC Cinematic Universe film zingah bul ṭan chhe ber pawl a ni a, ani aia che chhia chu Covid-19 hripui len laia chhuah - "Wonder Woman 1984" (USD mtd 16.7) leh, "The Suicide Squad" (USD mtd 26)-te an ni.

Khawvel pumah "Shazam! 2" hian market 78 aṭangin USD mtd 35 lalutin, a lakluh belhkhawm hi USD mtd 65.5 a tling phak tho a ni. Rotten Tomatoes-ah 53% hmuin, B+ CinemaScore chauh a hmu phak.

Sum lengvak a tlem

Kar hmasa Box office-a pakhatna 'Scream VI' pawh a ṭe ring tawk tawh lo a, USD mtd 17.5 lalutin pahnihnaah a tla thla. Khawvel puma a sum lakluh belhkhawm hi USD mtd 116 a ni.

Michael B Jordan channa boxing drama, 'Creed III' chu pathumnaah hnek tlakin a awm ve leh ta bawk a, USD mtd 15.4 lakluh belhin, khawvel huapah USD mtd 224.3 a hailut tawh.

Adam Driver channa sci-fi pic '65' chu palinaah awmin, "Ant-Man and the Wasp: Quantumania" chu panganaah a tla thla bawk a ni.