Hyundai sedan car Verna thar an tlangzarh

Hyundai Motor India Limited nimin khan India rama zawrh chhuah turin Verna thar a tlangzarh a, Mizoramah pawh CK Hyundai showroom thar, Bawngkawn, Hauva Filling Station bulah pho chhuah ve nghal a ni.

Mizorama Hyundai dealer hnen aṭangin mi 10 velin an hauh lawk a, CK Group Managing Director Joseph Lalchhanhima chuan chawpchilh takin an showroom tharah Verna thar an tlangzarh theih avangin lawmthu a sawi.

"CK Group-in kum 10 a tling ve tawh a. India hmar chhaka Hyundai servicing station lian ber kan neih hnuah showroom thar, a hma aia lian leh changtlung zawkah Verna thar kan khuh hawng thei a, min duhsaktute avanga hmasawnna a nih avangin lawmthu ka sawi a ni," a ti.

India rama sedan car zingah Hyundai Verna hi an hlawhtlinpui viau a; a elpui car dangte aia kawng hrang hranga chungnung turin a thar chhawp chhuak lehin, mawi, fel fai leh zahawm, him dam ṭha, amaha inkhalh thei hial turin khawl changkang nen an thuam bakah, a chhung digital hlang a ni bawk.

CK Hyundai Chief Executive Officer K Biakthianghlima leh 2023 Miss Chapchar Kut Lalrammuani'n an khuh hawng dun a, Rs nuai 11 aṭanga nuai 17 chuang senga lei theih tur a ni ang.

Mizoramah Verna hi sorkar hotu liante'n an hmang nasa ṭhin hle a, tuna mi pawh hi mipui hip leh zahawmna keng tel thei tur khawpa rin tlak a nih ngei an beisei tih an sawi.