Rajasthan pa kutbul tan kut khinghnih thar!

Asia khawmualpui ram ṭhahnem tak zinga a hmasa ber ni turin India chuan mellung thar pawimawh tak a siam. Rajasthan mi, kum 12 liam taa thirbana electric current kalin a man palh avanga a nunna chhanhimna tura a ban pahnih an tansak tak, Prema Ram Choudhry chu ban thar vuah sak (arm transplant) an tihsak!

Mumbai, Global Hospital-a doctor rualte chuan Ram-a'n hringnun pangngai tak a zawh chhoh theihna turin amah zaina atan hian darkar 16 zet hun an hmang a ni.

Ram leh a chhungte hian arm transplant tih theihna an zawng a, India ramah heng anga operation hautak tak ti thei an la awm loh avang leh, Europe ramah in zai man a hautak em avanga an beidawn hman hial thu an sawi. Global Hospital hi Asia-a hetiang ang operation kalpui hmasa ber an nih thu Times of India chuan a tarlang.

Arm transplant ti tur hian ban pahnih an zawm hmasak phawt a ngai a, a thisen luanna (blood vessels) zawmte, thisen supply ṭhat leh te a ngai tih Ram zaitu doctor te chuan an sawi. Ram hian Surat aṭanga donor a hmuh hnuah, February 9 khan hlawhtling takin operation hi a paltlang a ni. Dr. Satbhai chuan Ram ban thara nerve sensation-te hi nitin mm1 in zawm a ni a, a thluak aṭanga a kutzungṭang hmawra nerve thleng kim tur chuan ni 600 bawr vel a la mamawh dawn a ni, a ti.