Praise On 2022-a pahnihna Lalramnunmawi'n MV thar "Khawvel mamawh Isua Krista" tichhuak

Praise On 2022 mal zai intihsiakna neih zawh taka pahnihna, Lalramnunmawii chuan a music video hmasa ber "Khawvel mamawh Isua Krista" chu ngaihthlak leh thlir theihin YouTube-ah a dahchhuak ta.

He hla hi Durtlang Branch KṬP kumpuan film, kum 2018-a tihchhuah 'An dawng chiang lo' OST a ni. Hun rei tak tlangzarh loha a awm hnuah; bawhzui loa a riral mai hlauin Durtlang KṬP bultumin an veng nula Nunmawii ngei saktir an rel a, beisei ang ngeiin Gospel hla mawi tak min rawn hlui thei a, Praise On-a pahnihna nih phu hliah hliah khawpin a thiam zia a rawn tarlang a ni.

A hla chungchang sawiin,"He hla hi ka tan a hlu takzet. Tlang taka sawi chuan tuna Mizoram dinhmun hi a ngaihtuahawm hlein ka hria a, ṭhalai pawl anga chetchhuahna tlem lutuk te, ka ṭhalaipui khawvel thila tlan mek te hnuk hnai tura kan chetlakna beitham zia ka hmuh hian he hla hian ṭan a ngaih zia min hriatchhuah tir a ni. He hla hian chona thar min pe takzet a ni," tiin, a phuahtu rilru tak anga thlir pawhin hei hi a hla thuin a tum ber pakhat a ni tiin, Nunmawii chuan Vanglaini a hrilh.