billboard; Miley a sang tual tual; Country music hmel thar Morgan Wallen

Miley Cyrus chuan kumbul ṭanna atan a studio album pariatna "Endless Summer Vacation" a tlangzarh dawn tih a puan aṭanga hun rei vak lo hnuah; chu a album thar tura a lead single "Flowers" chu a rawn tichhuak nghal a, mipui nawlpuiah a tla nain a hlawhtlinpui rem rem hle. Kar hnih chhung pahnihnaah han tla thla zeuh mah se, Billboard Hot 100 chung berah rawn inhlangkai lehin, tunah chuan mawi takin a rawn par chhuak leh ta.

Disney Channel, Hannah Montana aṭanga khawvel hmuha rawn inpholang Miley hi kar sarih chhung (a zawn ni lo) No.1 a ni ta a, a studio album pariatna pawhin hlawhtlinna rawn chang chho zelin, 200 chart lamah pathumna dinhmun a hauh mek bawk. Kumin bikah ani aia artist thawm nei lian hi thlang dawn ila, sawi tur an vang viau ang le!

Album chart-ah Morgan Wallen

Billboard album chart-ah Morgan Wallen studio album pathumna "One Thing at a Time" chuan kar hmasa lama a dinhmun ngai rawn luah lehin, tunhnai chhoa country music vir vel dan chik taka kan thlir chuan Morgan Wallen aia huhang nei na hi an awm awm lo e. Wallen hian The Voice Season 6 aṭangin a hming a rawn chher ṭan a, kum 2021-a "Dangerous: The Double Album" a rawn tihchhuah meuh chuan rimawi lam tuimite chuan tu nge a nih inhrilhnawn ngai tawh loin kan hre fur tawh ang. Wallen album pathumna hi March 3 khan tlangzarh niin, hla 36 zet a awm a, kum 2021 hnua country album hralhchhuah hnem ber a ni bawk.