Justin album tharah Ed Sheeran

Canadian singer, Justin Bieber chuan album thar a buaipui mek tih thawm chu in lo hre tawh maithei, tute nge a thawhpui dawn tih erawh mumal taka puan a la awm loh hnuah British singer Ed Sheeran chuan album thar turah hian Justin nen "power ballad" duet an neih dawn thu a nemnghet.

Rolling Stone-in an kawmna, nimina tihchhuah takah Sheeran chuan rimawi a la tlangzarh loh ṭhahnem tak a lo thuhrukte pawh tlangzarh a tum thu bakah, Justin album tharah an thawhdun thu hi a sawi a ni.

Sheeran hian "Purpose" leh "Justice" album-ah tha a lo thawh tawh bakah, May 2019 khan single "I Don't Care" chu an lo tichhuak tawh bawk a ni. Justin hla hit tak "Love Yourself" kha Ed Sheeran phuah hi niin, Justin hnenah hian phal takin a pe a ni.

Justin hian a studio album pasarihna tur chungchang hi a sawichhuak khat hle a, a nupui Hailey chuan March thlaa Vogue-in an kawmnaah a pasal hian hla thar a ngaihthlak nin theih miah loh a neih thu a sawichhuak.

Justin album thar tur hi R&B leh hip-hop lam hawi tlem a tel beisei a ni. April 2022 khan Don Toliver a thawhpuina "Honest" chu tlangzarh a ni a, he hla hi a album thar tura a single hmasa ber tur niin mi tam tak chuan an ngai a, Justin chuan a thawhpui turte hming hi tarlang lo mah se, John Mayer nen an thawhdunna kan hmu thut a nih pawhin a mak lo ang.