Guiness World Record : Khawvela musician lár ber - The Weeknd

23rd March, 2023

Save Your Tears kan sawi ruala kan mitthlaa rawn lang nghal chu The Weeknd hi a ni awm e. Aw, kha pa ngei mai kha Guiness World Record chuan khawvela musician lar berah an puang ta rup mai!

Kum 33 mi, a hming tak Abel Makkonen Tesfaye hian music streaming lian, Spotify-ah world record pahnih a siam a, chungte chu thla khat chhunga Spotify-a a hla ngaithlatu nei ngah ber leh, monthly listener maktaduai 100 nei tling hmasa ber niin mellung pawimawh tak a phun.

Tunhnaia hlawhtlinna a chan theih chhan lian tak pakhat chu Ariana Grande nena an thawhdunna, "Die For You" remix kha niin, social media khawvela cheng kan nih tawh avangin hla khat viral-in artist thar pawh khawvel hriatah a vawrh thei a nih chuan artist ṭha mi tan chuan record thar siam bak hlen tur a awm tawh chuang bik lo a ni. He hla an tihchhuah aṭanga hun rei lote hnuah Billboard Hot 100-ah pakhatna a hauh nghal a, artist pahnihte'n Hot 100-a No.1 hla an neih pasarihna chiah a ni bawk.

The Weeknd hlawhtlinna hi a la tawp mai lo. Canada-a music award lian berte zinga mi, Juno Awards-ah award ngaihhlut pali–artist of the year, songwriter of the year, single of the year (Sacrifice) leh, pop album of the year (Dawn FM) chawimawina nopui a dawm haw bawk.

Starboy hitmaker a sáng fál

Guiness World Records chuan monthly listerner ngah ber The Weeknd leh pahnihnaa awm Miley Cyrus te inthlauhna hi a sang fal hle tih an sawi.

The Weeknd hian monthly listener mtd 100 chuang a neih tlin laiin, amah hnaih bertu Miley hian mtd 82.4 a nei a, mtd 18 dawnin an inthlau a ni. Miley hnuaiah hian Shakira (mtd 81.6), Ariana (mtd 80.6), Taylor Swift (mtd 80. 2), Rihanna (mtd 78.5) leh, Ed Sheeran (mtd 77.5) te an awm.

The Weeknd tan tun hi Guinness World Records award a dawn vawi khatna a ni lo thung. Kum 2016 daih tawh khan, kum 2015 chhung Spotify's most streamed album leh, solo male artist zingah Hot 100 Top 10-a cham rei ber, most consecutive weeks in Top 10 of Billboard's Hot 100 vangin certificate pahnih hlan a lo ni tawh bawk a ni.