Dylan Sprouse leh Barbara Palvin an inhual!

Kum nga chhuang zet an inzui hnuah Disney star, Dylan Sprouse leh Victoria's Secret Angel, Barbara Palvin-te chu an inhual niin khawthlang media te chuan nimin khan an tarlang ta chuai chuai mai le!

Dylan te hian official-in thuchhuah la nei lo mah se, rinhlelh theih awm takin Palvin hian thla hmasa khan a kut vei lamah diamond ring lian ṭha nel nawl tak a bunlai an hmuh thu an tarlang bawk.

Dylan leh Palvin-te hi kum 2018 aṭang khan an in date ṭan a, kum 2019-a W Magazine-in an kawmnaah Dylan chuan kahpah deuhin IG-ah a follow hnuah, an inngaina chho ṭan tih sawiin, "Min rawn follow a, kawng eng emaw tala ka chetchhuah a ngai tiin ka va DM zui ta mai a ni," tiin Victoria's Secret model hi inhmuhpuiah sawm zuiin, "Thla ruk chhung message min thawn lo," a ti. An official date hmasa ber chu China-ah an eizawnna thil avangin an neih daih thu Dylan chuan a tarlang.

August 2018 khan an inkar chu thup reng an tum tawh lo tih lantirin, an pahnihin an 'Instagram official' ta a, hemi kum vek September thlaah New York Fashion Week-ah red carpet debut an nei bawk.

January 2019 khan in khata chen dun zai an rel ṭan a, heta ṭang hian event hrang hrangahte inlan dunin, social media leh vantlang hmuhah an pahnih hian an inlan chho ṭan a ni.

Palvin pawhin a tawpah chuan atana khuanu ruat a hmuh thu Vogue Australia-in kum 2018-a an kawmnaah sawichhuak ve bawkin, "Kum ruk chhung ka single a, ka tan chuan bialpa neih hi thil pangngai a ni lo. Mahse Dylan nen kan intawn aṭang chiah kha chuan ka nun a inthlak hlawk a ni," tiin a hmangaih ber bulah hun tam zawk hman zel a duh thu a sawi.