Music Industry-in 2022 chhungin USD tld 26 lalut; Chhinchhiah theih china sum lakluh tam ber ṭum a thleng
Kum 1990 chho aṭanga music industry-in an sum lakluhte felfai taka chhinchhiah a nih hnuah, kum kal ta kha rimawi hmanga an sum hailuh tam ber kum a ni a, rimawi hmangin USD tld 26.6 zet an lalut a ni. Industry-in an sum lakluh aṭanga 67% chu streaming platform kaltlanga a hmuhte an ni. Nikum khan mi maktaduai 589 in man chawi, subscription base-in music hi an lei a, a kum hmasa leh kum 2021 khan mi mtd 523 velin man chawiin an lei thung a, kum khat chhunga a punna hi mtd 66 zet a nih thu zirchianna kalpuitu - International Federation of the Phonographic Industry (IFPI) chuan a tarlang.
Rimawi man chawia ngaithla an pung
United Kingdom-a streaming service lian ber, Spotify chuan kum 2009-a an platform an tlangzarh aṭangin subscription fee hi an la tisang lo a, individual subscription fee ah £9.99 an la a, streaming platform lama an khingpuite pawhin hetiang ang zat vel tho hi an chhiar tlangpui bawk a ni. Music hlutna belhchhah tur leh industry hmasawn zel tur chuan fee tihsan a hun tawh takzet tih sawiin , Warner Music hotu Simon Robson chuan fee tihsan chuan nasa zawkin sum lakluh hi a tipung dawn a, artist tan hamṭhatna lian zawk a thlen bawk dawn avangin hemi kawngah hian hma la tura an beih mek thu a sawichhuak.
CD leh Vinyl a la thi lo
IFPI tarlan danin, khawvel huap music industry hian tlakhniam lam a pan mai dawn lo niin a sawi a; a kum telin san lam a pan tial tial a, kum riat chhung zet chu ṭhanna duhawm tak a tawng tawh a ni, a ti. An sum lakluh zinga 49.8% chu Asia khawmualpui aṭanga rawn lut niin, Japan leh South Korea ram chuan fans te chu hun lo la kal zel tura thil hlu tak tur a ni tih hre rengin, CD leh vinyl-a lei uar tura ngenna an siam chu mipuiin an ngaih pawimawh sak hle a, hei hi an sum lakluh tam chhan lian tak pakhat a ni nghe nghe.
Rimawi ṭhan chakna - US
US chu khawvela music market ṭhan chak berna ram a la nih chhunzawm zel a, kum liam taa an revenue hian USD tld 10 a khum hial a, heti zat hi kum dangah an la lalut ngai lo a ni. Japan chuan dawtin pahnihnaah an awm a, UK chu pathumna a ni.
Revenue 28.4% zeta a san avangin China chuan France lehpelin palinaah an awm a, France chu panganaah an tlathla thung.
Taylor Swift a chungnung ber
IFPI global chart top 10-a artist-te hi ram pasarih aṭanga rawn chawr chhuak an ni. Taylor Swift chu kum liam ta chhunga artist sum hailut hnem ber niin, a studio album 10-na "Midnights" a tihchhuah avang leh, rimawi lama a sulhnu hnutchhiah tawhte a ropui em vangin a chung berah a rawn inhlangkai leh. Swift hi chart topper vawi thum a nihna a ni tawh a, kum 2014 leh 2019 khan artist sum hailut hnem ber nihna hi a lo hauh tawh bawk a ni.
Kum 2021-a pakhatna South Korea pop group BTS chu pahnihnaah tlathlain, K-pop band ṭhangduang tak pahnih - Seventeen (6) leh Stray Kids (7) chu an rawn lang bawk a, khawchhak lungpui a lum thui tawh hle. Artist zingah hla mal hralh ṭha ber chu Harry Styles a ni a, Grammy leh Brit-Award lawmman a dawn phahna "As it was" vangin he dinhmun hi a chelh ti ila kan sawi sual awm lo e.
Global artist recording chart 2022
Artist & Ram
1. Taylor Swift - US
2. BTS South - Korea
3. Drake - Canada
4. Bad Bunny - Puerto Rico
5. The Weeknd - Canada
6. Seventeen - South Korea
7. Stray Kids - South Korea
8. Harry Styles - UK
9. Jay Chou - Taiwan
10. Ed Sheeran - UK
Source : IFPI