Tekashi 6ix9ine-a'n mi kut a tuar; Ṭhat lam a pan zel - Official

American rapper, Tekashi 6ix9ine, a hming tak Daniel Hernandez chu Nilaini khan Florida gym-a sauna chhungah mipa rualin an sawisak rawn. South Florida-a tualchhung thuneituten thil thleng an hriat veleh rapper hi damdawi-in hnai berah an dahlut nghal a ni. Tekashi hian hliam na tak tuar mah se, a dinhmun erawhin ṭhat lam a pan ve zel niin official-te chuan nimin khan an sawi.

Tekashi-a attorney Lance Lazzaro chuan, 6ix9ine hian amah tawngtute hi beih let tum mah se, an intam hleih em avangin LA Fitness gym sauna-ah sawisak a ni a, gym-a hnathawkte'n an ṭhelh veleh heng mite hi an tlanchhe zui a ni, a ti.

"Gummo" hitmaker hi chhimbal rawng sam leh, a hmaiah tattoo ṭhahnem tak a chhut avangin mi mit a la bik a, pawikhawihna chi hrang hrangah lo inhnamhnawih tawhin, a gang hlui Nine Trey Gangsters testimony a tih-chhuah avangin thubuai a awrh tawh bawk.

Tekashi lakah hian racketeering, drug trafficking, leh firearms offenses vangin thubuai pakua siamsak a ni tawh. Kum 2018 khan kum hnih chhung lungin tang tura tih a ni a, Covid-19 hripui leng vanga ngaihhnathiam a nih hnuah chhuah zalen a ni. Hetiang khawpa rapper kawlhrawng a nih avang hian hawtu leh thaha vauna pawh a tawng nual tawh bawk a ni.