India rama Celebrity hlu ber - Ranveer Singh

Bollywood lemchanthiam, Ranveer Singh chu kum liam ta chhunga India rama celebrity hlu ber, ‘most valued celebrity’ ah corporate investigation and risk consulting firm, Kroll chuan a thlang.

Ranveer hi kum 2010 khan "Band Baaja Baaraa" film aṭangin lemchan khawvel a rawn luhchilh a, hemi hnu hian Bollywood actor ngaihven hlawh ber pawl niin hlawhtlinnain a um zui ti ila kan sawi sual awm lo e.

Tunhnaia Ranveer-a film channate hian sum tam tak hailut lem lo mah se, a brand hlutna erawhin a san lai ber a tawng mek thung. Ranveer-a brand hlutna hi USD maktaduai 181.7 (Rs vbc 1500) niin an tarlang. Indian lemchanthiam zinga hlawh hnem ber pawl niin, kum 2012 aṭang khan 'Forbes India's Celebrity 100 list'-ah a la lang chho char char a ni. Kum 37 mi Ranveer hi television game show 'The Big Picture' ahte inlanin, brand leh product ṭhahnem tak a endorse na aṭangin sum hi a hailut. Ranveer Singh net worth hi USD mtd 30 (Rs vbc 245) angin an chhutsak a, film pakhat aṭangin Rs vbc 30 vel zel a la ṭhin a ni.

“Celebrity Brand Valuation Report 2022: Beyond the Mainstream,” report aṭanga a lan danin, 2021-a pakhatna - Kohli brand value hi USD mtd 176.9 (Rs vbc 1400) angin an chhutsak. Tunhnaia film lama che chhe angreng tak Akshay Kumar chu pathumnaah awmin, a hlutna hi USD mtd 153.6 (Rs vbc 1200) angin an chhutsak bawk.

South Indian film star te an che ṭha

A sang pathum zinga pahnih chu Bollywood star ten luah mah se, South Indian actor - Allu Arjun leh Rashmika Mandanna te pawh a vawi khatna atan list-ah hian an rawn lang. Ram pum dengchhuak khawpa film hit 'Pushpa: The Rise'-a a changtute pahnih, Allu Arjun chuan USD mtd 31.4 (Rs vbc 259) neiin 20-naah a rawn lang a, Rashmika chuan USD mtd 25.3 (Rs vbc 209) neiin 25-naah a rawn inhlangkai bawk a ni.

Kum liam ta khan box office-ah South Indian movie te hi an che ṭha hlawm hle a, advertising leh ram pum huap media industry lam thlengin Tollywood-a mi challang tak takte hmel hi kan hmu chho zel dawn ni pawhin a lang.

Hetih lai hian, tunhnaia Ranveer-a film hnuhnung pathum - 83, Jayeshbhai Jordaar leh Cirkus te kha box office lamah an che ṭha lo hle thung a, Karan Johar kutchhuak romantic comedy film 'Rocky Aur Rani Ki Prem Kahani' hmangin comeback ropui tak nei turin a chungah beiseina sang tak a awm. He film-ah hian Alia Bhatt nen an chang dun dawn a, kumin July thla hian tlangzarh a ni ang.