Ivy Park Sales chhiat vangin Adidas leh Beyonce inṭhaṭhen

American singer, Beyonce Knowles leh Europe-a sportswear siamchhuaktu lian ber, Adidas te chuan Park Ivy sales a tlakhniam avangin an thawhhona an titawp.

An inkar an tihtawp tak avang hian Beyonce chuan a brand-ah thuneihna pumhlum a chang tawh dawn a, a duh ang taka Ivy Park a enkawl thei tur chu a lawmzia a sawichhuak nghe nghe.

February thla khan, Wall Street Journal chuan kum kalta aṭangin Ivy Park sales hi a tlahniam hle tih an sawi. Ivy Park hian kum 2021 khan USD mtd 93 lalutin, kum 2022 khan an brand sales chu 50% vel zetin a tlahniam tih a sawi a, USD mtd 40 chauh lalut anga chhut niin report chuan a tarlang.

Adidas chuan nikum chhung khan USD mtd 250 vel bawr lalut tur anga an inbeisei laiin, an project an phak lohna hi USD mtd 200 chuang lai a nih avangin inremna tihtawp mai hi an thlang ta niin an sawi.

Inremna an tihtawp hma, kumin January thla khan Beyonce chuan Adidas x Ivy Park collaboration, 'Park Trail' chu Dubai-a concert a neih pahin tlangzarhna hun a lo nei tawh bawk a ni. Beyonce contract hi kumin kum tawpa zo tur ni mah se, an inremna angin USD mtd 20 bawr vel chu la hailut tho tura beisei a ni.

Beyonce hian kum 2016 khan Topshop neitu, Sir Philip Green nen Ivy Park hi neitu inṭawm, joint venture hmangin sumdawnna bul an ṭan. Kum 2018 khan 50-50 venture chu titawpin, Queen Bey chu company-a neitu pumhlum nihna chelhin, hemi kum vekah hian Adidas nen thawkdunin Ivy Park hi an din thar leh a ni. Inremna an tihtawp chungchangah hian Adidas leh Beyonce-te hian thuchhuah an la nei lo ve ve.