New Zealand-in ṭhalai; ngaihzawng ṭhente'n ngai an awh leh theihnan USD mtd 4 seng dawn

New Zealand chuan Nilaini khan The Love Better campaign an din a, hemi kaltlang hian ṭhalai; an ngaihzawng ṭhente'n ngai an awh theihna tur leh, hmangaihna vanga an rilru natna thawidamna kawng khat atana tih a ni. Ministry of Social Development chuan he campaign kalpuina tur hian kum thum chhung atan USD mtd 4 a ruahman.

He campaign hi New Zealand-a ṭhalaite bultuma kalpui a nih hnuah, sorkar beng a thleng chho a, he hmalakna hi sorkar chuan ngaihpawimawh sakin an hmalakna hi an tihlawhtlinsak ta a ni.

"Kan rama tleirawl 1200 chuang zetin hmangaihna leh rilru nat kawngah chhawmdawl an mamawh tih an sawi a, heng zingah hian ngaih-zawng ṭhen vanga rilru natnate chu hmachhawn hautak berah an ngai," tiin associate minister for social development and employment Priyanca Radhakrishnan chuan a sawi.

Ministry of Social Development-in an rama tleirawl 1200 chuang an zirchiannaah, 68% chu kawppui ṭhen avanga tawrh dan pangngai aia nasa zawka tuar tih an hmuchhuak. Radhakrishnan chuan tleirawl rilru no takte'n rilru chhel zawk an neih theihnante, a ṭha zawnga hringnun an hmachhawn dan tur leh, kawppui an zawn leh zelna kawngah inkaihhruaina mumal tak neih chu an thupui a nih thu sawiin, Love Better campaign hi chhungkuaa tharumthawhna thleng ṭhinte leh, mipat hmeichhiatna hman khaw lohna titlem tura sorkar hmalakna a ni, a ti.

Ministry of Justice tarlan danin, New Zealand Police-te chuan family violence vangin kumtin thubuai nuai 1 chuang an buaipui ziah a ni. Kum 2020 khan, police te chuan kum 18 hnuai lam zingah sexual violence kaihhnawih vangin thubuai 9,723 thehluh a ni tih Ministry of Justice chuan a tarlang.