Shakira ka rinawm lohsan avangin inchhirna ka nei lo - Pique

Barcelona defender hlui, Gerard Pique chuan a kawppui hlui Shakira a rinawm loh san avanga inchhirna a neih loh thu a sawichhuak.

Spanish newspaper, El Pais-in an kawmnaah Pique chuan, "Shakira chunga ka chetdanah inthiam lohna ka nei lo a, kan fate himna chu ka dah pawimawh ber a ni. Hei hi nu leh pa tihtur hmasa ber a ni a, an pa ka nihna anga ka thiltih mek pawh a ni," tiin media hmaah engmah thup ngai a neih loh thu a sawi.

Shakira nen an inṭhen hnu lawkah, Pique hi Clara Chia nen an inkawp nghal chat a; an inzui aṭanga hun rei vak lo hnuah 'instagram official' nghalin, an thlalak dunna te pawh IG-ah an tarlang nghal a ni. Hei hian Shakira riltu a tina hle tih a hriat theih a, Colombian singer chuan a kawppui hlui kahna hla, diss track tichhuak nghalin, a hla thuah "Rolex chu Casio-in i thlak," tihte hialin a kap zui a ni.

Mahse, Pique erawh chuan mipui ngaihdanah beng a chhi lem lo tih sawiin, a zinkawnga thutluknate chu uluk taka a ngaihtuah hnua a siam an nih thu leh, a hlimna tur chauh a ngaihtuah thu a sawi. "Ka mihring ngaihtuahte leh hmangaih berte chu a kip a kawia ka nihna hrechiangtute an ni. Thil dangah ngaihtuah ka nei lo," tiin Pique chuan a sawi.

Shakira leh Gerard Pique-te hi kum 2011 aṭangin an inzui ṭan a, fa pahnih Milan leh Sasha an nei . Kum 11 chhung zet an inzui hnuah June 2022 khan an inkar chu an titawp tiin thuchhuah inṭawm an siam a ni.