2021-2022 RUNMAWI Top Seller - ZOTE ENTERTAINMENT

RUNMAWI SPECIAL AWARD TOP SELLER 2021 leh 2022 chu Zote Entertainment hnenah hlan a ni. Kum 2021-a tlangzarh 'Nutei Thingpui Dawr' hi Psychological Thriller a ni a, kum 18 chunglam chauh en phal tura buatsaih a ni chungin 2021 Top seller a rawn ni thei tho a ni. Chutiang bawkin, kum liam ta 2022-a tlangzarh 'KA U LIANA' pawh top seller rawn ni bawkin, he film boruak len zia leh Zofate mittui a kohchhuah hnem zia chu kan hre tlangin a rinawm. 'Ka U Liana' hi Mizo society leh tualchhunga kan nitin nuna thil thleng thei thawnthu simple leh mawlmang tak ni mah se, a hmuhnawmin zirtir nei ṭha takah an lo lanchhuahtir thei a ni.

Zote Entertainment te hi kum 2015 aṭanga rawn in din chho ṭanin, 'Tluangteii Diary (2015)', 'Detective Mart (2017)' tih film aṭangin bul an rawn ṭan chho a, 'DUHAISAM (2019)', 'ṬHIAN LUNGDUM (2020)', 'KA CHAWL TA ( short film 2021)', 'NUTEI THINGPUI DAWR (2021)', 'KA U LIANA ( 2022)', leh 'AMAWII (2023)' te hi an kutchhuakte an ni a, film industry tan an thawhhlawk hle!

An film tihchhuah hnuhnung ber 'AMAWII' hi kumin February 11 khan tihchhuah niin, tunah hian engtik lai pawhin RUNMAWI APP-ah en theihin a awm mek a ni. He film chungchang sawiin, "Kan rin leh beisei phak bakin mipuiin min ngaihhlut sakin min en sak nasa hle a, Mizo film ah chuan khel leh sawi hlawh tak pawl a ni angem aw min tih sak ṭhin a ni," tiin film director Mike chuan Vanglaini a hrilh.

Zote Entertainment hi kum 2021 aṭang khan Board of Directors rorelna angin an kal ṭan a, Board of Directors ten uluk taka an ngaihtuah hnuah project reng reng hi kal pui chauh a ni ṭhin. An hnuaiah hian Makeup Artist leh Designer leh Brand thlengin Official taka in rem chhoin, kalphung fel fai takin an kal chho tawh a ni. Tunah hian project thar buaipui chho mekin, Comedy lam an rawn hawi tawh thung dawn niin a lang a, Mizo Society behchhan lam tho a rawn ni leh dawn a, hun reilo te hnuah casting call neih chhuah vat beisei kan beisei a ni, an ti.