Mahindra Great Escape-ah lirthei 30 an thawkchhuak

Mahindra & Mahindra chuan kum 1996 aṭang khan anmahni dawrtute tan India ram pumah Great Escape a huaihawt thin a, Mahindra Sports Utility Vehicle (SUV) neitute tan bik ni khat chhung hman ṭhin a ni.

Mana Motors chuan anmahni dawrtute duhsak letna leh, intihhlimnan Inrinni liam ta khan 'Great Escape' a buatsaih a, an lirthei a ṭha tawk em tih fiahna ni nghalin kawng an zawh bakah kawng chhiaah an inel.

Mizorama Mahindra motor full range dealer, Dr Franklin Lalrinngheta chuan an showroom, Bawngkawn, Aizawl aṭangin a vai liam a, lirthei 30 vel Muthi lui thlengin an inzui a, Tuirial Airfield-ah inelna hlimawm leh chona tling tak an nei zui bawk.

Tlankawng siam chawpin kawng chhia leh khuarah an inkhalhsiak a, a neitute tan hun hlimawm leh tawn hriat danglam a nih bakah an lirthei a ṭha tawk em tih en nan a ṭangkai a, tlang ram leh kawng chheng chhiaah engtiang taka hman tlak nge a nih lantirna a ni tel.

Dr Franklin Lalrinngheta chuan, "Mana Motors tan hun pawimawh tak a ni a, sumdawng kan nih angin mi dangte tana pek let hi kan duh dan a ni. Min duhsaka min dawrtute tana hun bik leh intihhlimna buatsaih phei chu kan ngai pawimawh em em a ni," a ti.

Mana Motors chuan he event hi a ngaihluin theihtawp chhuahin a kalpui a, tun ṭumah hian an lirthei chhuanvawr Thar, Scorpio, Bolero leh a dang neituten hlim takin hun an hmang a ni.