Selena leh Zayn inkarah eng nge awm?

Hailey leh Selena inkar a ṭha; an in-follow tawn!

Artist kawppui nei lo zinga langsar ber thlang chhuak dawn ila anni bak an awm chuang lo ang an tih theih zinga mi, Selena Gomez leh Zayn Malik-te chu New York khawpuiah ngei mai chawhlui an kil dun niin khawthlang media te chuan an tarlang tlat mai le!

Selena leh Zayn-te hi New York-ah Ningani zan khan an chhuakdun lai hmuh an ni a, mita hmutute sawidanin, "Selena leh Zayn-te hi zan dar 10:30 bawr velah SoHo aṭangin an chhuak dun a, banah inkai chungin an in 'kiss' bawk. Restaurant-a thawkte leh a hmuna kal ve dangte chuan anmahni an ni tih hi an hre lem lo. Hun hlimawm tak an hmang dun tih a hriat theih a, an in date ngei a ni tih pawh an chetziaah a hriattheih a ni," tiin Entertainment Tonight chuan a tarlang.

Hetih lai hian, Selena emaw Zayn emaw chuan an inkar thuhlaah thuchhuah an la nei lo. Zayn hian a kawppui hlui Gigi Hadid nen fanu duhawm tak Khai an nei. Gigi nu, Yolanda Hadid nen inhmuhthiam lohna an neih avangin, nikum October thla khan Gigi leh Zayn-te hi an inṭhen phah hial a ni. Chutihlaiin, Selena erawh Chainsmokers' Drew Taggart nen thui taka sawizawm ni mah se, an inkarah engmah a awm loh thu leh a single thu TikTok kaltlangin Selena chuan a puang zui a ni.

Selena hian Kylie Jenner (mtd 382) lehpelin hmeichhe zinga IG-a followers ngah ber leh, followers mtd 400 nei tling hmasa ber niin, mellung pawimawh a siam a, "Mi maktaduai 400 zawng zawngte u; ka kuah chak vek cheu," tiin lawmthu sawina a tichhuak zui bawk.

Hailey leh Selena inkar a ṭha

Hailey Bieber chuan Selena nen an nunhlui lama an inbakkaih tawhnate dahṭhain, Selena chunga lawmthu sawina post social media kaltlangin a siam mauh mai!

Mithmul vanga inhnialna a chhuah hnuah, Selena leh Hailey inkar hi a ṭha lo hleah mi tam tak chuan an ngai a, Hailey pasal Justin Bieber hi Selena ngaihzawng hlui a lo ni ve bawk nen, mi tam tak ngaihven a hlawh phah hle a ni. Mahse milar, vantlang chunga leng an nihna angin puitling takin an inkara thubuai awmte chu thu tak hla takah an ngai lem lo tih an chezia hmangin an rawn tilang. Hailey chuan, "Selena a lo ṭawngchhuah avangin a chungah lawmthu ka sawi a, kan pahnih inkara thawnthu awm hi kar kalta aṭang khan kan sawidun tawh a ni. He buainaa inhnamhnawihte tan hun harsa tak a ni a, mi maktaduai chuangin huatna chawkchhuak thei zawngin thu an vawrhvir hi a ṭha lo takzet. Social media hi inpawhtawnna ṭha tak leh, inkawmhona ṭha tak a ni a, heng hunte hian mi suihkhawm aiin inṭhendarhna a siam zawk a ni," a ti a, Selena pawhin ṭawngkam dengkawng tak tak hmang lo tur leh, mi rilru hriselnate chu ngaihpawimawh sak turin ngenna a lo tichhuak tawh bawk a ni.

Selena chunga Hailey chet dan chu a nunrawn thlak an tih avangin mi maktaduai chuangin Hailey leh Kylie hi IG-ah 'unfollow' mah se, Selena leh Hailey-te hi IG lamah an in follow tawn tawh thung. "A nihna hre lote, thawnthu kimchang hre lo emaw thawnthu kaihhlek zawng emawa thil lantir theih a ni. Keipawh tiamin, kan thil post leh kan ṭawngkamah ngaihtuahna thui tak kan neih hmasak phawt a ngai a ni," tiin Hailey chuan thupuarpawleng vawrh darh tawh lo turin ngenna a siam zui a bawk.