John Wick 4-in franchise record thar a siam

29th March, 2023

American neo-noir action thriller film, tlangzarh hma hauh aṭanga fak hlawh em em mai, Keanu Reeves channa 'John Wick : Chapter 4' chu beisei ang ngeiin a rawn che ṭha hle a, franchise record thar rawn siamin; John Wick film zingah tlangzarh kara sum hailut hnem ber record a rawn siam bawk.

John Wick franchise danglamna pakhat chu, a chhuak thar apiang hi a hma aia mi ngaihven, hmuhnawm leh mi lawm a hlawh zual ṭhin hi a ni. Lemchan khawvela mi bik, a larna hmachhuan loa mi pangngai anga khawsa ṭhin leh, khawthlang ram celebrity zinga nun tlawm berte zinga mi Keanu chan vang ni te pawhin mi tam tak chuan an ngai hial a ni.

Kum 2014-a tihchhuah John Wick film hmasa ber khan tlangzarh karah USD mtd 14 a lalut a, kum 2017-a tihchhuah "John Wick: Chapter 2" in USD mtd 30.4 a lalut. Kum 2019-a tihchhuah "John Wick: Chapter 3 - Parabellum" khan USD mtd 56.8 lalut lehin, "John Wick: Chapter 4" phei kha chuan USD mtd 73.5 lai a hailut thei a, a kum telin huhang a ngah zel a, sum pawh a hailut hnem tial tial a ni. Darkar hnih leh minute 49-a rei, R-rated “John Wick: Chapter 4,” hian “A” CinemaScore hmuin, entu zinga 69% chu mipa niin, entu aṭanga 70% chuangte chu kum 25 chunglam an ni.

John Wick 5?

John Wick 4 hi he franchise-a film hnuhnung ber tur nia sawi thawm a awm hman a, mahse a chet ṭhat avangin Lionsgate's motion picture group president Joe Drake chuan John Wick 5 kan hmuh theihna 'chance' sang tak a awm tiin a sawi thawi zui nghal a ni. Hei bakah hian, John Wick tlangzarhna market 71-ah pakhatna dinhmun a hauh fai vek bawk a, heng aṭangte hian USD mtd 64 vel lalutin, a sum lakluh belhkhawm chu USD mtd 137.5 a tling der tawh a ni.

Box office chart-ah che ṭha fal awm lo

Kar hmasa lama pakhatna "Shazam! Fury of the Gods" chuan beisei a phak lo chhunzawm zel a, pathumnaah tla thlain, boxer ro thap - Rocky film franchise kalzel; Michael B Jordan channa "Creed III" chu pahnihnaah a rawn thochhuak leh.

"Scream VI" pawh pahnihna aṭangin palinaah a tla thla a, "65" chu panganaah a la inham tang bawk a ni.