The Big Bang Theory episode-a Madhuri Dixit chungchang an sawi dan avangin Netflix insawifiah turin hriattir

Political analyst, Mithun Vijay Kumar chuan The Big Bang Theory episode pakhatah Indian lemchanthiam Madhuri Dixit chungchang an sawidan avanga an lungawi loh thu sawiin, insawifiah tura hriattirna, legal notice a pe.

Kumar chuan Big Bang hi Netflix aṭanga paih tur leh, he show hi mi pawi sawina bakah mi hmingṭhatna tichhetu a ni, a ti.

The Big Bang Theory season hnihna, episode khatnaah Sheldon Cooper (Jim Parsons) leh Raj Koothrapalli (Kunal Nayyar) chuan Aishwarya Rai leh Madhuri Dixit-te chu khaikhinin, Raj chuan "Aishwarya Rai chu pathiannu ang mai a ni a, Madhuri Dixit erawh phar leh nawhchizuar a ni," tiin a sawi.

Kumar chuan legal notice a pekah hian, "Hnam zia rang leh an ngainat zawngte pawi an sawi thei a ni tih hriain, Netflix hian mawhphurhna lian tak an nei a, an chetdan avangin hma pawh an la ve tur a ni. Streaming service provider-te hian an platform-ah eng ang content nge an pekchhuah ṭhin tih uluk takin chik ṭhin se la, an content pekchhuahte hi mi tihmingchhe zawng emaw mi pawi sawi zawng emaw a ni em tih enfiah hmasak chu an tihtur a ni," tiin a tarlang.

Khawvela sitcom lar ber zinga mi, The Big Bang Theory hi season 12 zet chan a nih hnuah, kum 2019 khan a tawp a, tunah hian Netflix-ah stream theih a ni.