billboard: Miley Cyrus leh Morgan Wallen hming kan lam bang thei lo

Miley Cyrus hla hit "Flowers" chu kar riat chhung Billboard Hot 100 chart-ah pakhatna a ni ta a, album chart lamah Morgan Wallen pawhin a chetṭhat la chhunzawm zelin, kar thum chhung a zawnin a chung berah a awm tawh a ni.

Aw...Miley

Miley hian kar ruk chhung a zawna pakhatna dinhmun a hauh hman a, kar hnih chhung pahnihnaah han tlathla zeuh mah se ropui takin a rawn thochhuak leh thei a, ani aia zaithiam kum bul ṭan ṭha hi thlan tur han zawng ta ila; thlanchhuah tur an vang viau ang le!

Miley hi a kalna tawh vek vekah chuan thawm nei lian pawl tak a ni zel a, album thar "Endless Summer Vacation" pawh hi album chart lamah a che ṭha hle a, pathumnaah a awm mek a ni.

Hetihlai hian, 200 chart lamah "One Thing at a Time" album hmanga pakhatna hauhtu, Morgan Wallen lead single “Last Night” chu a dinhmun ngaiah awmin pahnihna a ni a, Hot 100-te ang thoa tehfung mumal tak hmang ve, Hot Country Songs-ah kar sarih chhung pakhatna a ni tawh a ni. Billboard Women of the Year atana thlan SZA chuan a hla “Kill Bill” hmangin top 3-ah a la inhamtang ve bawk.

Aw...Morgan

Country music hmel thar tiha kan sawi ṭhin, Morgan Wallen-a studio album pathumna "One Thing at a Time" chuan Billboard 200 album chart-ah a zawnin pakhatna dinhmun a hauh leh ta!

He album hian equivalent album unit 2,09,500 zet hmuchhuak lehin; pahnihnaa awm SZA nen hian an inthlau hle. Kar thum chhung a zawna album unit nuai 2 chuang nei thei artist pahnih chiah an la awm - Taylor Swift "Midnights" leh Drake "Certified Lover Boy" te kha kar thum chhung unit nuai 2 nei tling thei an ni a, heng mi bikte huangah hian Morgan Wallen "One Thing at a Time" album chu kan thailang ve thei tawh a ni.

Hun rei tak chhung pakhatna lo ni tawh, R&B singer huhang ngah tak SZA album "SOS" chuan unit 72,000 hmuchhuakin pahnihnaah a awm mek a, paihthlak theih loh ang maia khawsa Taylor Swift "Midnights" hian tlakhniam lam a pan hleithei lo; nikum October thla daiha tlangzarh tawh kha ni mah se, parukna aṭangin pathumnaah a rawn invawrh leh a, Eras Tour neia hun hmang mek Swift boruak len zia a sawifiah chiang mai awm e.