JB-a'n rimawi chawlhsan a tum?

Justin Bieber chuan tunhnai khan a music catalog zawng zawngte USD maktaduai 200 zeta a hralh hnuah, rimawi chawlhsan tumna rilru a pu ṭan niin report thar ber chuan a tarlang.

Canadian pop star hi nikum khan Ramsay Hunt syndrome a nei tih an hmuhchhuah aṭangin enkawlna a dawng char char a, tunah chuan hma pawh a sawn tawh hle. Justin hian a hriselna chu ngaihpawimawh hmasakah neiin, a nupui Hailey Bieber kiangah hun tam zawk hman a rilruk tiin an sawi. "Justin khawvel hi tunhnai chhoah a danglam chak hle a, a larna hi a indelh behtir chang a awm fo niin ka hria," tiin, "Justin thil tih hian hlimna a thlen thei lo a nih chuan, thutlukna harsa tak siamin a tuina chu a kalsan rih a ṭul niin Justin-a therapist chuan thurawn a pe," tiin a ṭhian hnai tak pakhat chuan a sawi.

News site ṭhenkhat chuan, "Justin hian rimawi khawvel boruak hi a tan a ṭha ber lo tih a hria," tiin a nupui nen an sum neihte hahdam taka chen rih an tum thu an tarlang ve bawk. Justin chawlh tum chhan nia lang chu a nupui Hailey kianga hun tam zawk hman a duh vang niin an ngai.

Justin leh Hailey-te hi September 2018 khan kum naupangtein an inkutsuih a, an inneih hian kum 24 mi leh kum 21 mi chauh an ni. Nupa tam tak ang bawkin inhmuhthiam loh chang an nei ve ngei dawn a, tunhnaiah pawh Selena Drama vangin 'trust issue' a piang thar leh niin an sawi a, hei vang hian Justin chuan an nupa inkar chu ngaihpawimawh hmasakah neiin Hailey kiangah hun tam zawk hman a thlang a nih pawhin a demawm viau lo ang le.