Celebrity Beauty Brand hlu ber Rihanna 'Fenty Beauty' : Priyanka Chopra Haircare Brand 'Anomaly' pahnihnaah!

Cosmetify-in kum 2023-a celebrity beauty brand hlu zual an thlan chhuahah American singer, Rihanna-i beauty brand "Fenty Beauty" chu a pakhatnaah awmin, a hlut zawng hi USD mtd 477.2 niin, an brand hlutna hi revenue kaltlanga an chhutsak a ni. Pahnihnaah hian India mi, Priyanka Chopra hair care brand "Anomaly" chu awmin, a hlut zawng hi USD mtd 429.9 niin an chhut sak a ni.

Hausa ber aṭanga google-a celebrity beauty brands zawnhlawh ber thlenga zirchiangtuin report a tarlan danin, kum khat chhunga hmasawn chak ber chu Priyanka hair care brand Anomaly Haircare hi a nih thu an tarlang.

US reality TV personality, Kylie Jenner-i brand "Kylie Cosmetics" (USD mtd 301.4) chu pathumnaah awmin, singer Ariana Grande R.E.M. Beauty (USD mtd 70.3) chu palinaah a awm a, hmeichhe zinga IG followers ngah ber leh mtd 400 followers nei tling hmasa ber record siamtu thawm ngah tak Selena Gomez "Rare Beauty" (USD mtd 50.2) chu panganaah a awm a ni.

UK-a hmunpui nei, beauty comparison platform - Cosmetify chuan "Brand hlut zawng hi tehna kawng hrang hrang a awm thei a, mahse chung zinga pawimawh leh tehfung atana rintlak tak chu revenue hi a ni. Hei vang hian, kum kalta annual revenue hmangin celebrity beauty brand hlu zual hi kan thlangchhuak a ni," an ti.

Fenty Beauty hi celebrity brand ni kher loah pawh brand hlawhtling tak a ni sa a, beauty brand hlu zual 'overall beauty brand'-ah pawh pathumnaah a lang phak hial a ni.

Kumin kumtir khan, Rihanna hian SuperBowl LVII Halftime Show ropui tak a lo hnutchhiah tawh a, hei vang hian Fenty brand value chu USD mtd 5 velin a pun phah niin an tarlang.

Hetihlai hian, Priyanka Chopra chuan nikum lawk khan a hair care brand hi tlangzarhin, Vogue India-in an kawmnaah Priyanka chuan beauty entrepreneur-a inleh a tum thu a sawilang. Priyanka hi The Matrix: Resurrections-ah chang zo chiahin, Game of Thrones star Richard Madden nen Prime Video series Citadel a chang turin a inbuatsaih mek a ni.

Celebrity Brand hluzual te:

1. Rihanna 'Fenty Beauty' - USD mtd 477.2

2. Priyanka Chopra 'Anomaly' - USD mtd 429.9

3. Kylie Jenner 'Kylie Cosmetics' - USD mtd 301.4

4. Ariana Grande 'R.E.M. Beauty' - USD mtd 70.3

5. Selena Gomez 'Rare Beauty' - USD mtd 50.2