Avril leh Tyga te'n an inkar thu hlaah hmanhmawh ngai an ti lo

Avril Lavigne leh Tyga-te chu inngaina viau mah se, an inkar thuhlaah hmanhmawhna chhan tur a la awm loh tih an sawi a, nunphung pangngai tak nen an inkar chu kalpui rih an tum thu an sawi.

Kum 38 mi Avril hi a pasal hual, kum hnih chhung zet a lo kawp tawh Mod Sun (36) nen kumin February thla khan an inṭhen a, hun eng emaw liam taa an lo sawizawm tawh Tyga nen hian official-a an inṭhen thu an puan aṭanga ni hnih hnuah, Malibu, California-ah hun hlimawm tak an hmang zui nghal a ni.

Tyga hian USD 80,000 man hu lunghlu ṭhi lian ṭha nel nawl tak 'Avril' tih inziahna a pe a, an inkarte chu zawimuanga an kalpui mek thu an sawi. "An la exclusive lo a, an miziate inhrechiang tawn turin an khawsa mek. An pahniha an him zawk nan muang changin thil an kalpui a, inngaihzawnna khur thuka an luh hmain inhriatchian phawt an duh a ni," tiin People chuan a tarlang.

Report tarlan danin, an pahnih hun hmandun karah Tyga hian music thar a buaipui pah mek bawk. Avril hian kar hmasa khan Tyga lunghlu ṭhi pek hi a awrh lang nghe nghe. Kim Kardashian tan custom necklace lo siam tawh, celebrity Jeweller Eric Mavani chuan Avril ta tur lunghlu ṭhi siam tura ngenna chu Tyga hnen aṭanga a dawn thu sawiin, white diamond, black diamonds leh pink sapphire carat 50 an phum a, "Made for Avril Lavigne" tag chu a hnungah a inziak bawk a ni.

Avril kawppui hlui Mod Sun chuan a nupui hual nena an inṭhen hi a rilru nat thu IG kaltlangin a lo puangzar ve bawk a ni. "Kar khat chhungin ka nun hi a inthlak chiang kher mai. Thil thleng hian chhan ṭha tak a nei ngei ang tih ka hria. In dawmkun mai loin, ka thinlungin dik nia a hriat chu ka zawm zel ang; kehchhe vek dawn pawh ni ila" tiin an inṭhen hlimah a sawi a, Mod Sun hian tour neiin state hrang hrang a fangkual mek.

TMZ chuan Mod leh Avril inkar hi a ṭha lo hle tih an lo tarlang tawh a, hemi hma hian an lo inṭhen zuai tawh niin an sawi a, an inṭhen chhan hi midang kawpsan vanga thleng a nih loh thu an sawi.

Kum khat chuang an inzui hnuah Mod leh Avril-te hi March 2022 khan Paris-ah an inhual a, an inhual aṭanga kum khatna velah an inṭhen thu kan hre zui a ni.