Barack Obama paih thlain Elon Musk chu Twitter-a follower ngah ber ni ta!

Twitter neitu, Elon Musk chuan twitter-a follower ngah ber ni ṭhin, US president hlui Barack Obama chu paih thlain ama company-ah vek follower ngah ber a ni.

He thu buatsaih lai thleng hian, mi hausa tawntaw Elon hian followers 133,068,709 neiin, pahnihnaa awm Obama chuan 133,042,819 a neih thu an tarlang.

Musk hian nikuma USD tluklehdingawn 44 zeta Twiiter a lei fel hnuah, Obama hi kar loah a rawn lehpel leh ta mai a ni. Twitter hotu hian nikum June thla khan followers mtd 100 a nei tling a, a ni telin a ngah chho zel a, kum khat ral hmain khawvela followers ngah ber a ni chhunzawm leh thei a ni.

Musk hi Twitter-a thuneihna pumhlum a chelh hnuah mipui mar dek zawngin a khawsa thiam ṭhin hle. Thutlukna lian tak tak heng - platform-a US president hlui Donald Trump kir tirte, Twitter CEO aṭangin ka inhnukdawk duh a ngem tih te'n mipui ngaihdan a la kual ṭhin a, hei hian mi ngaihven pawh a hlawh phah hle.

Hetih lai hian, Musk-a'n a changa thu ho ang reng tak takte a post laiin, Obama erawh chuan hun leh thil thleng pawimawh tarlanna atan chauha a hman ṭhin avangin US president a nih lai ang khan huhang a lo ngah tawk tawh lo bawk nen, a tlahniam pawh hi a awm lo hran lo a ni. Obama dawtah hian zaithiam Justin Bieber,Katy Perry leh Rihanna te'n dawtin, football star Cristiano Ronaldo chu IG lamah talna viau mah se, twiiter-ah erawh followers mtd 108 neiin panganaah a awm thung.

Twitter-a followers ngahzualte:

1. Elon Musk - mtd 133.1

2. Barack Obama - mtd 133

3. Justin Bieber - mtd 113.4

4. Katy Perry - mtd 108.5

5. Rihanna - mtd 108.2

6. Cristiano Ronaldo - mtd 108

7. Taylor Swift - mtd 92.5

8. Narendra Modi - mtd 87.4

9. Donald Trump - mtd 87.3

10. Lady Gaga - mtd 84.8