Vanglaini Bihchianna ; Entreprenuership Huang - Plastic hnuchhawna paper hmanga thil siam ṭhin JH Handmade

JH Handmade hi May 15, 2019 ah din ṭan niin, Aizawl Municipal Corporation-in 'No Plastic' lama beihpui an thlak denchhenin paper hmanga kuta thilsiam tumna rilruah lo awmin, paper bag aṭanga hmalak ṭan a ni. Paper hmanga thil hrang hrang siam tumin hma lak chhoin Birthday Banner, Gift Box, Pinata (hawlhpawp), Man Semna Envelope leh Inneih Sawmna te an siam chhunzawm. Tunah hian, Man semna chu an siam tam ber leh an insawrbingna a ni.

Business background hranpa nei loin, paper hmanga thilsiam hi an tuina avang leh, kan ramin a mamawh chho zel dawna hriatna avangin an siamchho ṭa a ni.

"Pathian thil thlawn pek liau liau a ni, inzirna hranpa pawh awm loin bul kan ṭan a, kut hnute a mam thei ang bera tih tumin; inzir chung zelin hma kan la a, a tirah chuan hlep pawh nei mumal lo in inzirna nen bul kan ṭan. Siam sual leh siamdik loh pawh a tam ṭhin khawp mai. A chang phei chuan a dik leh dik lo te hi a inzat thuak ṭhin a, hlep awmlo a hralh chang a tam ṭhin khawp mai. Tin, material te hi Aizawl a kan hmuh theih chin leh online a kan chah hmangin kan siam ṭhin," tiin JH Handmade chuan an sumdawn bul ṭan chhoh dana an harsatna tawhte an sawi.

Sumdawnna kaltlanga thil tum leh hmachhawpte –

Mitin lei phak tura man tlawm ber aṭanga siam chu an tum ber a nih thu sawiin, "Customer-te nen inlaichinna ṭha neih kan duh a, an design duh ang te, an mawi tih zawng, an lungawina leh an duhthusam man man taka lo siamchhuah hi kan duh ber leh tum ber a ni," an ti.

Paper hmanga hnamdangte siam theih ang chi chu siamchhoh ve zel an tum thu leh an hmachhawp leh tih mek a ni. Man semna envelope lama an insawrbing hnu phei chuan hmeichhe tamt akte'n an man eitute mawihnai taka pek tur man semna envelope an duh ang taka siamsak chu an tum leh duhthusam a nih thu an sawi.

Mizo tradition nen inrem tur tak design dangte pawh la buatsaih zel an tum thu sawiin, "Kan hnamziarang vawnhimna kawnga ṭangkai thei ni a kan hriat avangin hmalak zel kan tum a ni," an ti.

Instagram-ah "JHHandmade" tih account neiin, hetah hian an thilsiam te phochhuah ṭhin a ni a, a dawrtu tam zawk hi IG kaltlanga lo hretu an nih avangin lawmthu an sawi bawk a ni.

Hnathawh dan leh hnathawk chhawr

JHHandmade hian hnathawkah mi hrang an chhawr lo a, chhungkuain an hun neih remchan dan angin an thawk mai ṭhin. Sumdawnna zauh zel a, product tam zawk siamchhuah tumin thawktu pawh lakbelh an tum thu an sawi. Dawr hranpa neiloin, in lamah an order dawnte hi an siam mai ṭhin a, a chang phei chuan hunin a daih loh ṭhin avanga (hun bik nei e.g inneih, birthday angah te) order zawng zawng siam sak theihloh chang an neih ṭhin thu sawiin, duhsaka an mahni dawrtute chungah ngaihdam an dil nghal bawk a ni.

Bungrua semchhuah dan tlangpui

A dawrtute duhdan leh inbiakremna angin an semchhuak emaw a hmunah emaw an lam ṭhin a, pickup leh delivery in an kalpui. Khaw hrang hrang aṭanga dawrtute chu an khaw sumo service emaw courier-ah emaw te an thawnsak mai ṭhin.

Thla tin sum lakluh dan

Mitin ban phak tura an thilsiam zuarchhuak ṭhin an nih avangin sum lut thur thur hi an dah pawimawh hmasak ber a ni lo tiin, "Kan bulṭan aṭanga kum 1-2 chhung vel kha chu a hlawkna hi sawitur a tam em em lo a, a design-te zir pahin hunte kan hmang chho bawk nen, thlatin sumluh dan hi a in anglo ṭhin khawp mai. Tun hnai kum hnih chhungin min duhsaktu customer te kan nei ṭhahnem ve ṭan ta a, Pathian zarah eizawnna tlakin sum kan lalut chho ve thei ta a ni," tiin sum lakluh kawngah pawh hma an sawn chhoh ve zel thu an sawi.

Entreprenuership an hmuh dan

"Entrepreneurship hi kan tan chuan thil thar a ni a, thiamna leh skills hran nei loin kan ṭan ve a ni. Mi tam tak duhsakna kan dawng a, nitin thil thar kan zirbelh mek zel bawk. Kan thlen chinah inrintawkna tam tak te pawh min siam niin kan hria a, mahni kutchhuak ngei miin mawi ti taka an hmang kan hmuh hian Entrepreneurship hlutna hi kan hre thar tak meuh meuh a; mahni kea din hlutzia pawh nasa takin kan hriatchian phah a ni. Taimak leh dawhtheih a ngaih zia te, huai taka kan ruahmanna angte leh, kan rilrua awm tih hlawhtlin tuma 'risk' lak pawp hi a lo ngai niin kan hria," tiin kawng engkima taihmak leh tum bulbal tak neih a pawimawh zia an sawi a ni.