Fashion Fusion 2023 a hlawhtling; Vakiria online platform thar www.vakiria.shop tlangzarh

Vakiria Institute of Fashion Technology (VIFT) buatsaih, an zirlai kal chhuak turte kut chhuak entirna Fashion Fusion chu March 31,2023 khan Millennium Centre Roof Top-ah hlawhtling taka neih a ni a; he mi rual hian Vakiria buatsaih online marketing website thar www.vakiria.shop tlangzarh a ni.

Online hmanga Vakiria kut chhuak hrang hrang lei theihna tur www.vakiria.shop tlangzarhtu Lalramsanga Sailo, IRS, Secretary LESDE Department chuan ṭhalaite eizawnna siamsak kawnga Vakiria hnathawhte a fak a, Vakiria online platform thar chu a hmangtute leh puanṭhui leh designer-ten hlawkna tam tak an dawn belh zel theihna'n duhsakna a hlan.

Fashion Fusion hi Mizorama fashion show kalpui chhoh meka hlun ber niin kum 2011 khan kalpui ṭan a ni a, VIFT-a zir chhuakte puala buatsaih niin Mizoram top model-te an inlan ṭhin a ni.

Kuminah hian a endiktu (jury) atan mi pathum - Tluangpuii Hmar, Escape Engmawia leh Zosangi (Ngote) te hman an ni.

VIFT-ah hian kum tin zirlai an la thar ṭhin a, Mizoram mai ni lo hmar chhak state hrang hrang aṭangin zirlai an kal ṭhin. Kum tluana an hnathawhte leh Fashion Fusion atana an kut chhuakte endik niin zirlaite hnenah hetiang hian lawmman sem a ni:

Designer of the year - Lalremkimi

Most creative - HC Lalremruati

Most commercially viable - Lalnghilhlovi

Best garment construction - Laltlanliani

Best craftmenship - Betsy Hmar & Sarah Lunching

Best collection - Veithenmoi Touthang

Lawmmante hi Angela Zothanpuii, Director LESDE Dept-in a hlan a; zai thiam Benjamin Sum leh Lalngaihsaka (Mizo Idol) an zai bakah lam thiam rual Mizo Dance Camp an lam bawk. Angelina Paul chuan he show hi a kaihruai a ni.