Nita Mukesh Ambani Cultural Centre hawnnaah Hollywood leh Bollywood milarte an inlan ṭha hle

Nita Mukesh Ambani Cultural Centre (NMACC) hawnnaah zet zawng India ram milarte mai ni loin khawthlang rama milarte thlengin an fuan khawm ṭha hle.

NMACC hi kar liamta Zirtawpni khan Mumbai-a Jio World Centre-ah hawn a ni a, he hunah hian Bollywood aṭanga Hollywood milar heng - American model Gigi Hadid, fashion designer Law Roach, Tom Holland, Zendaya, Penelope Cruz aṭanga Indian A-list star Shahrukh Khan, Alia Bhat, Salman Khan, Ranveer Singh, Deepika Padukone, Kareena Kapoor, Saif Ali Khan leh midang eng emaw zat chu India thuam nen an inlan a, exhibition leh gala-te neih nghal a ni. India thuam chi hrang 140 zet phochhuah niin, heng thuamhnaw chitinte hian India tan chanchin ril leh nghawng a neihdante a phenah hian zehtel a ni a, India ram media mai ni lo; khawvela entertainment media mitfukna ber pakhat a ni mek a ni.

NMACC gala-ah hian Spiderman star, Zendaya leh supermodel, Gigi Hadid te chuan India thuam saree nen ngei mai Red Carpet an rawn zawh a, India media-te chu an hawi a lo chauh a ni ber.

Zendaya hian midnight blue saree tle nalh tak rawn inbelin, Indian designer Rahul Mishra kutchhuak a ni. Spiderman lama a chanpui leh, a kawppui nia an sawi Tom Holland chuan a ṭawiawm bawk a ni. Victoria Secret Angel chhe lo tak, Gigi Hadid chuan ivory leh gold rawng saree rawn inbel thungin, Abu Jani leh Sandeep Khosla te'n an design sak a ni.

NMACC-ah hian India ram chanchina fashion industry-a an sulhnu leh kutchhuakte phochhuah a nih mai bakah, music, theatre, fine arts leh crafts lama India hnam ziarang a huhoa phochhuahna event lian tham berte zinga mi a ni. He centre hi India cultural infrastructure leh, arts hmanga India hnam hlawhtlinna phochhuahna hmun pawimawh tak a ni chho thei dawn a ni.

Hei bakah hian khawvel huap fashion brand design lar - Dior, Chanel leh YSL kutchhuak chhuanvawr bikte pawh pholan an ni. India designer ṭha Anamika Khanna, Tarun Tahiliani, leh Sabyasachi Mukherjee te kuthnu Indian couture mawi tak tak an pholang bawk