Khiangte Construction Ṭhazual Gospel; Amosa Vocal Point an la thiam reng

Khiangte Construction Ṭhazual Gospel chart thar berah Champhai Vengthlang Branch KṬP aṭanga rawn indin chho a, male voice ṭhangduang tak rawn ni mek Amosa Vocal Point chuan an hla thar ber "Nang chu Pathian pangngai reng" hmangin chart chung ber an rawn luah ve leh ta!

Rimawi ropuina belhchhahtu

Ṭhazual Chart lama mikhual lo tak, Amosa Vocal Point hi an zaithiam a ni mai lo a, musical instrument, a bikin ṭingṭang mawina an phawkchhuak thiam ṭhin hle. An hlate hi thluk bik nei, ngaihthlak nuam leh hla hahdam tak; mut pah pawha ngaihthlak veng veng chi min chhawpchhuah sak ṭhin a, band anga an thawhhona a ṭha ṭhin hle tih an hla hmangin an rawn lantir. Hun rei tak chhung chart-a an lan hnuah, hma lam pan rawn zelin tunah chuan a chung ber an rawn luah ta a ni. An hla dang heng - "Ṭhenna ram", "Kraws, kei mi chawisangtu", "Bethlehem arsi eng mawi ber" leh hla dang eng emaw zat an lo tichhuak tawh a, anmahni belchiang duh tan YouTube leh streaming platform lamah an hlate hi ngaihthlak theihin a awm a ni.

Rebecca Fanai & Lalthansangi an rawn hnai

Chin TV 'Chin new artist of the Year 2022' atana thlan, Rebecca Fanai hla thar ber "Min zirtir ang che" chu pahnihnaah rawn langin, he hla hi Zonet-a dahchhuah a nih hnuah hmasawn chak ber pawl niin, pakhatna ni thei turin dinhmun ṭha takah a ding.

Ṭhazual Award 2022-a 'Best Mizo Traditional Artist'-a thlan, Lalthansangi chuan Mizo hnuk khawih thei tak tur hla 'Misual ka ni Lalpa min ngaidam rawh' chu a aw thluk danglam tak nen rawn sachhuak lehin, ngaihthlak a manhla lehpek hle a; a chung chiaha awm Rebecca Fanai zuan khuma pakhatna a lo ni a nih pawhin a mak hran lo ang.

Tute nge lo lang?

Vri Pautu, Kimkima Khiangte leh Murfelo-te thawhhona "Hmangaihtu i ni si" pawhin chart chunglam rawn pan zelin palinaah a awm tawh a; Puipuia Chhakchhuak "Thlarau Rose par" chuan pen khata hma rawn sawnin parukna aṭangin top 5 huang a rawn dai kai bawk.

Christina Vanlalnghaki, Angaiha Fanai, Ruth G, One in Christ leh Seraphic Choir-te chu chart a rawn lang thar leh la cham chhunzawm zelte an ni.