China-a college pakhatin an zirlaite ni 7 chhung 'romance break' an pe!

China rama college pakhat - Mianyang Flying Vocational College chuan an zirlaite chu April 1-7 chhung romance break an pe a, hei hian mipui ngaihven a hlawhin, social media lamah sawizui pawh a hlawh phah hle.

China-a college ṭhenkhatte chuan nipui chhung hian chawlh an pe ṭhin a, chawlh chhung hian zirlaite chu campus pawnah hun hmang tam tur te, leilung(nature) kianga hun hmang tam turin an ngen a, hmangaihna peipung zel tur leh, an chawlh hmang ṭangkaia fa neih tam kawngah ṭhalaite chu ṭan la turin an chahzui bawk a ni.

China hian hun rei tak chhung 'one child policy' an kalpui avangin nau piang zat an tlahniam chak hle. Kum sawm bi dana chhiarpui neihah, decade ruk hnua a vawi khatnan an population hi tlahniamin; hun eng emaw chhung chu hniam lam a pan zel dawn thu leh, an economy thlengin a tawrh phah thei dawn tih mithiamte chuan an sawi.

China-a National Bureau of Statistics report chuan, kum 2022 khan an ram mi tld 1.4 chuang aṭangin mi 8,50,000 velin an tlahniam niin a sawi a, an ramin ṭampui an tawrh hnuhnung ber, kum 1961 hnua mipui an tlakhniam leh ṭum khatna a ni bawk. China rama birth rate hi mi 1000 zelah 6.77 piang ang an ni a, kum 2021 khan 7.52 niin. chhinchhiah theih chinah nikum kha birth rate hniam ber ṭum a ni.

UN expert-te chuan kum 2050 hian China population hi mtd 109-a tlahniam thei turin an chhutsak a, kum 2019-a forecast an siam aiin a let thumin a hniam zawk dawn tihna a ni.