BILLBOARD: Lal thar a piang; a hming chu JIMIN

Jimin chuan solo artist angin hnuhma duhawm tak a rawn hnutchhiah chhunzawm zel a, a studio album hmasa ber "Face" aṭanga a solo single pahnihna, "Like Crazy" chuan Billboard Hot 100 chung ber a rawn luah a; March 24, 2023-a album a tlangzarh "Face" chuan Billboard 200 chart lamah pahnihna dinhmun rawn hauh bawkin, Billboard-ah lal thar a rawn piang ta!

JIMIN tan record duhawm

BTS member, Jimin hian a band member puite a zuankhum a ni mai lo a, South Korean artist zingah kum 1958-a Billboard Hot 100 din a nih aṭanga chhiarin pakhatna dinhmun chelh thei hmasa ber a ni. UK Singles Chart-ah pariatna dinhmun rawn hauh bawkin South Korean solo artist zinga thleng sang ber niin record duhawm tak a siam.

Kum 2012 khan, South Korean artist PSY chuan "Gangnam Style" hmangin khawvel min lamtir a, hlawhtling viau e ti loin, pahnihna aia sang a thleng thei ta bik lo a ni.

Jimin hian chart roreltu a ni tih a hriat veleh a IG kaltlangin chanchin lawmawm hi rawn tarlang nghalin, "Ka hmangaih vek che u," tiin a bandmate RM leh J-Hope-te pawhin lawmpuina an hlan a ni.

Synth-pop track "Like Crazy" hi kum 2011 a tihchhuah 'Like Crazy' tih film aṭanga lakchhawn a ni. Korean leh English version-a tihchhuah niin, Korean ṭawnga sakah hian hmangaih ber chan leh a tak ramah an la cheng ve reng tih hriatna chungchang tarlan a ni a, English version-ah erawh lemchan khawvela phurrit an tawhdan leh mahni nihna hloh chungchangte a rawn tarlang thung a ni. Heng version pahnihte hi Pdogg, Blvsh, Chris James, Ghstloop, Jimin, BTS bandmate RM, leh Evan-te thawkhoin'a an ziah a ni a. RM hian a hla inrawlhnaah Hot 100 No. 1 track pali a nei tawh a, BTS' Hot 100 No. 1 track "My Universe", "Butter", leh "Life Goes On"-ahte pawh a kuthnu hmuhtur a awm bawk .

Album chart-ah Morgan Wallen bawk!

Tunlai country music a 'in' ber tiha chhal ngam Morgan Wallen chuan "One Thing at a Time" hmangin 200 album chart-ah a zawnin kar li chhung ro a rel ta.

Kar hmasa khan equivalent unit nuai hnih dawn hmuchhuak lehin, a chetṭhat a la chhunzawm zel a, hun eng emaw ti chhung chu a hming hi kan lam nawn chhen a nih pawhin a mak lo ang, a chhan chu a hlate hian belhchian an dawl em vang a lo ni.

Jimin debut album "Face" chu pahnihnaah awmin, kum 2021-a Olivia Rodrigo-i'n "Sour" album pakhatna a nihpui hnuah, "Face" hi debut album hlawhtling ber dawttuah a rawn inhlangkai.

Hun rei tak hnuah Lana kan hmu leh ta!

Lana Del Rey album thar "Did You Known That There's a Tunnel Under Ocean Blvd" chu pathumnaah awmin, Lana hian Billboard 200 top 10-ah album pakua lai a lanpui tawh a, mellung pawimawh bik rawn phunin, khawvel artist piang tawh zinga hlawhtling ber pawlah a hming a rawn sawhnghet nawn leh awn awn a ni.

Kar riat chhung zet pakhatna a nih hnuah SZA "SOS" pawh panganaah a lo tlahniam ve ta a, Luke Combs album thar "Gettin' Old" chu palinaah a rawn invawrh thung.