TIME100 reader poll-a mipui duh ber - Shah Rukh Khan

Shah Rukh Khan chuan Oscar-winning actor Michelle Yeoh, tennis star Serena Williams, Meta CEO Mark Zuckerberg leh Brazil President Luiz Inacio Lula da Silva-te lehpelin, TIME100 Reader Poll-a vote maktaduai 1.4 tlaah SRK a chungnung ber.

Mipui chuan TIMES magazine-in kum liam ta chhunga khawvela huhang ngah ber an thlanna, most influential people dawng tura inhmeh berah an thlang chhuak a ni.

Dawn phu hliah hliah vek

Vote tla maktaduai 1.2 aṭanga 4% vel hmutu SRK dawtah hian, Iran hmeichhiate dikna leh zalenna tura sualtute an awm. Pathumnaah hian Covid-19 hripui kara an nunna thaptu health care worker-te awmin, anni hian vote tla aṭanga 2% an hmu a ni. The Duke and Duchess of Sussex, Prince Harry leh Meghan Markle-te nupa chanchin hian khawvel media-te ngaihven a hlawh chho zel dawn tih a lang a, vote 1.9% hmuin palinaah an awm a, World Cup-a an ram Argentina champion puitu, football player ropui Lionel Messi chuan vote tla aṭanga 1.8% hmuin pangana dinhmun a hauh ve bawk.

SRK chanchin sawi kan bang thei lo

Shah Rukh Khan hian a lemchan zinkawngah hian film chi hrang 100 chuangah a inlan tawh a, kum li chhung zet thawm nei loa a bo hnuah, "Pathaan" hmangin ropui takin kum 2023 a khuhhawng a ni. SRK bakah Deepika Padukone leh John Abraham-te channa hi kumina Indian film hlawhtling ber a la ni mek a, Pathaan meuh khum zo an awm angem tih chu tlumte thlira thlir vauh vauh chi a ni ngei ang le. SRK hi film-ah a chang a ni mai lo a, a direct piah lamah a produce bawk a, IPL cricket team Kolkata Knight Riders co-owner a ni mek bawk a ni.