Lance Reddick leh Coolio thihchhan chu?

John Wick star Lance Reddick leh, "Gangsta Paradise" hitmaker Coolio-te thihchhan chu kar hmasa khan mipui hriatah puanzar a ni ta.

Lance Reddick

March 17-a kum 60 mi nia fam ta, Lance Reddick-a death certificate aṭanga a lan danin, lung lam natna - ischemic heart disease leh, atherosclerotic coronary artery disease vanga thi niin an tarlang. Certificate chuan Lance-a ruang hi halral tura thu a pek angin, halral a ni tawh a ni.

Lance hian John Wick a chanpuite chu chhungkua ang maia a en ṭhin thu sawiin, Keanu Reeves nen he film franchise-ah hian kum 10 chhung zet chu an lo tal ho a ni. Tunhnaia tihchhuah 'John Wick : Chapter 4" kha Lance inlanna hnuhnung ber a ni ta a, amah hriatrengna'n Lance a rawng duh ber ngei, ribbon pawl chu a changtute chuan an banah an hreng nghe nghe a ni.

Coolio

Nikum September 28-a rapper fam ta, "Gangsta's Paradise" hitmaker Coolio (59) thih chhan pawh puanzar a ni a, Fentanyl overdose vanga thi a nih thu The Hollywood Reporter chuan a tarlang.

Kum 1990 chhoa rapper lar tak ni ṭhin, It Takes a Thief (1994), Gangsta's Paradise (1995), leh My Soul (1997) hmanga rap khawvel ti hausatu hi ruihtheih thilah a talbuai ve ṭhin hle a, a ruang an hmuh pawh hian a thisen zunzamah heroin leh methamphetamine hnuhma hmuh a ni a, a hma pawhin Asthma-te lo nei tawhin meizial pawh a zu nasa ṭhin hle tih a manager Jamal Posey chuan a sawi. Coolio ruang pawh hi halral niin, a thih aṭanga thla ruk chuang hnuah Los Angeles County-a Coroner office chuan a thihchhan hi an puangzar chauh a ni.