'Harry Potter' TV series siam tumin hma la mek

British author J. K. Rowling kutchhuak, khawvel fantasy novel lar ber pawl tiha chhal ngam 'Harry Potter' chu television series-ah siam tuma hma lak mek a ni.

Daniel Radcliffe, Emma Watson leh Rupert Grint-te channa - Harry Potter film franchise hi Warner Bros kaltlanga pekchhuah niin, he film hlawhtling tak hi tunah chuan tluklehdingawn hu chuangah an chantir tawh a, fanbase an neih ṭhat piah lamah a kum telin he lehkhabu chhiartu leh film entu hi an pung chho zel. An hlawhtlinnaah la lungawi mai loin a novel-a thawnthu tlem azawng kaihlekin HBO Max streaming service chuan tharthawh leh tumin inbiakna hi an kalpui mek a ni. Inremna an nei thei a nih chuan Rowling hi series producer-ah a ṭang zui dawn tih Deadline chuan a tarlang.

Rowling hian kum 1997-2007 chhung khan Harry Potter fantasy novel hi volume sarih a ziak hman a, novel writer hlawhtling ber zingah rawn inhlangkaiin, March 2023 thleng khan he lehkhabu hi copy maktaduai 600 chuang hralhchhuah tawh a ni a, khawvela book series hralhchhuah hnem ber niin, ṭawng 85-a chhiar theih tura chhawpchhuah a ni bawk.