Fandango Scoob! in 'Trolls World Tour' a nek chhuak
American ticketing company Fandango chuan kar liam taa tlangzarh thar Scooby Doo computer animated movie Scoob! chu US on-demand movie chart-ah No.1 a nih thu a tarlang.
FandangoNOW on-demand movie chart-ah hian 'Trolls World Tour' hi thla khat chuang No.1 a ni tawh a, kar liam ta maia tlangzarh Scoob! hian a nek chhuak ta a ni.
'Trolls World Tour' hi April 10-a tlangzarh daih tawh kha a ni a, computer-animated movie tho niin, an tlangzarh hunlai hian theatre tlem azawng hawn a la nih avangin theatre-a chhuah theih turin an tlangzarh a, digital rental pawhin an tlangzarh tel nghal tho.
America-ah chuan lawm a hlawh nghal hle a, Fandango-in kar tawpa on-demand movie chart a tihchhuah ṭhinah pawh No.1 a ni rei hle a, mahse Scoob! hi a ngam ta lo a ni.
Scoob! a hmuhnawm
Scoob! hi Scooby-Doo fan-te tan chuan a hmuhnawm hle dawn tih a chiang. Shaggy leh Scooby-Doo inchhar dante he film-ah hian tihlan a ni a, chumai bakah Velma, Fred leh Daphne-te nena an inhriat ṭan dawn pawh a lang bawk. An naupan lai aṭanga an inzui dan a lang zuai hian Scooby-Doo ngainatute lawm a hlawh hle.
Hripui a len avangin 'Trolls World Tour' ang lo takin Scoob! hi chu threatre-a en theih tura tlangzarh a ni ve lo thung.
On-demand movie chart top 10-ah hian 'The Invisible Man', 'Capone' leh 'Sonic'-te pawh a lang a ni.
Tunkar chhung hian film tlangzarh thar tur a awm nual a, chung zingah chuan 'Military Wives', 'Survive the Night' leh 'Body Cam'-te pawh a tel. Box Office chart tihchhuah a nih rih loh avangin FandangoNOW on-demand movie chart hi film ṭha tehna pawimawh tak a ni rih dawn niin a lang.