Hmangaihna a dai zo ta! Kum 6 hnuah Swift leh Alwyn an inṭhen
Taylor Swift leh Joe Alwyn-te chu kum ruk chhung an inzui hnuah an inṭhen.
Zaithiam leh lemchanthiam te hi kum 2016 aṭang khan an inzui ṭan a, kum eng emaw zat chhung chu an inkar hi mipui hriatah an tilang chiam ngai lem lo a ni. Mahse Swift erawh chuan hla phuah thiam bik tihtakah a hla ṭhenkhatah an inkar chungchang hi a lo thai lang fo tawh ṭhin a ni.
Report thar berin a tarlan danin, Swift leh Joe-te hi kar enge maw zat liam ta khan an lo inṭhen fel tawh tih sawiin, an inṭhen hi thil mak tak a ni hran lo tiin, "An inzawmna hian chuai lam a pan a, Swift-i show-ahte Alwyn lan ngai loh chhan pawh hei hi a ni," tiin ET chuan a sawi.
A sakhming Joe
Nikum October thla khan Swift chuan Joe nena an inkar chungchang sawiin, "Lavender Haze-ah i awm chuan, hmangaihna thuk takin a hual vel che tihna a ni. Suangtuahna khawvelah Lavender Haze-ah i awm a nih chuan, hemi hmuna awm tur hian engpawh tih i inhuam ang a, hmangaihna chhumpuiah hian midang tumah inpaihthlak tir i phal lo ang," a ti.
"Social media khawvela cheng kan nih tawh avangin, milar ni kher lo tan pawh miin hmangaih i tawng tih an hriat chuan eng emaw zawng tak chuan i phur a rit sawt dawn a ni. Kum ruk chhunga kawppui ka neih lai khan, thuthang leh tabloid mak tak tak kan pumpelh a ngai a, ngaihsak loin heng thute hi kan hnuchhawn zui mai ṭhin. He hla pawh hi thuthang dik lo hnawl a, thil nihna dik tak zawk vawnghim tura phuah ka ni," tiin Lavender Haze chu Joe nen an inkar thuk tak a puanchhuahna hla pakhat a nih thu sawiin, heng bakah hian a album ṭhenkhata a hla eng emaw zatte chu Joe nena an inkar a tarlannate an ni bawk.
Joe pawhin kum 2018-a Vogue-in an kawmnaah tihian sawiin, "Mi hian a phena thil thleng hriat an tum tih ka hria. Kan inkar hi hlawhtling takin mipui hriatah kan puangzar lo niin ka hria a, hei vang hian mipui pawhin an pawmthiam tawh niin a lang," tiin vantlang hriata an inkar puanchhuah loh chu kal dan ṭha zawkah a ngaih thu a lo sawilang tawh a, mahse an intawn aṭanga kum ruk a vei meuh chuan thawnthu pawh a lo danglam ta a, an inkar vawnghim tura an beihna zawng zawng pawh a thamral zui a tih theih ang.
Eras Tour leh a chhehvel
Tunlai hian, Swift chuan Eras Tour neiin khawpui hrang hrang a fangkual mek a, a tour hma lawk khan hla thar pali - Eyes Open (Taylor’s Version), Safe & Sound (Ft. Joy Williams and John Paul White) (Taylor’s Version), If This Was a Movie (Taylor’s Version) leh, All of the Girls You Loved Before."-te chu a tichhuak bawk a ni.
Nikum October thla khan Swift hian a studio album 10-na "Midnights" chu tichhuakin a hlawhtlin pui hle a, he album-a hla ṭhenkhat chu Joe a puala a phuahte an ni hlawm. Taylor-i album hmasa zawk "LOVER"-ah pawh khan Joe chungchang hi tarlan a ni a, London Boy, Lover, leh Cornelia Street-te kha Joe tana a lehkhathawn niin an sawi bawk.