Sports team neitu zinga hausa ber - Mukesh Ambani

Gautam Adhani kut aṭanga Asia khawmualpui pa hausa ber nihna a chhuhsak hnuah, Mumbai Indians cricket team neitu, Mukesh Ambani chu sports team neitu zinga hausa ber niin Forbes chuan a tarlang.

Ambani hian Los Angeles Clippers basketball team neitu leh, pakhatna dinhmun hauh reng ṭhin American sumdawng hausa, Steve Ballmer chu a lehpel a ni. Kum liam ta chhung khan Ambani-a Reliance Industries share chu 3% velin tlahniam mah se, kum 2000-2014 inkara Microsoft CEO leh share ṭhahnem tak neitu Ballmer pawh a sumdawnna hi a lo tlakhniam ve tho avangin India pa hi a chungnung ta ber a ni.

April 4, 2023 khan Forbes chuan khawvela sports team neitu hausa zual 20 an thlangchhuak a, hetah hian Ambani thil neih hlut zawng hi USD tld 83.4 hu angin an chhutsak a, Ballmer hian kum hmasa khan USD tld 10 chuang hlohin, a thil neih hlut zawng hi USD tld 80.7 hu niin pahnihnaah a tla thla ta a ni.

Nikum khan, Indian Premier League (IPL) team zingah Mumbai Indian chu USD tld 1.3 hu niin, IPL team zinga hlu ber nihna an lo chelh tawh bawk.
Hei bakah hian, Reliance hian Women’s Premier League franchise leiin, South Africa leh UAE ramah te pawh cricket team an enkawl mek bawk a ni.