Science & Environment; Ni aia a let mtd 20 vela rit Black Hole hmuchhuak

American space agency NASA chuan blackhole bo hlauhawm tak a awm thu sawiin, he black hole lian zet mai hi kan universe-ah chak takin a thlawk mek a, kan solar system a rawn thlen meuh chuan kan chenna leilung aṭanga thla(Moon) thleng turin minute 14 chiah hun a mamawh dawn tih an sawi.

NASA thuchhuah tarlan danin, black hole hmuhchhuah thar hi, ni(sun) aiin a let 20 velin a rit a, arsi hnuhma la hmuh ngai loh ṭhahnem tak hnutchhiah bawkin; light year 2,00,000 vela zau niin, Milky Way aiin a let hnihin a lian zawk a ni, an ti.

NASA astronomer-te sawi danin, he black hole mak tak hi kum mtd 50 kal taa galaxy pahnih inzawmkhawm vanga thleng niin an sawi a, hei hian a lai takah black hole hrawl leh hnawksak tak a pian tir a ni, an ti a, hemi hnua galaxy pathumna rawn inbelhbawm leh chuan black hole hlauhawm zawk leh lian zawk a siam zui tih an sawi.

Researcher-te chuan black hole pahnih an talchhuah avanga black hole pakhat rawn inmung chho zelin a hrin niin an sawi a, a 'host galaxy' chu chhuahsanin a bak pahnih chuan kawng dang an zawhzui a ni, an ti bawk.

Scientist-te chuan James Webb Space Telescope leh, Chandra X-ray Observatory hmanga black hole nihna chhuizui leh uluk taka vilzui a; a nihna chiang zawka hailan an tum thu an sawi a ni.