Khiangte Construction Ṭhazual Lengzem; David Darlong "Lungdum" a chungnung ber

Khiangte Construction Ṭhazual Lengzem chart-ah Mizo Idol Season 7-a pathumna dinhmun luahtu, David Darlong-a music video thar ber "Lungdum" chu a chungnung ber.

David-a'n lung a dum zo

David-a hian Mizo Idol aṭangin a hming rawn chher chhoin, intihsiakna neih chhung zawnga mipui mit fukna ber pakhat a ni. Mi ngainat leh fanbase nei ṭha ber pawlah rawn inhlangkai zuiin, hei hi eng dang vang ni loin a zaithiam piah lama a chezia leh mizia hian mi lung a dum zo ngei tih chu chart hmang hian a rawn lantir nawn leh a ni.

"Lungdum" tih hla hi Chama Khawlhring chuan kum 2003 bawr vel khan a phuah a, fam ta Gnat Lalrinchhana khan a album hmasa berah rawn a sa a, hei hi mi nawlpuiin he hla kan hmelhriat ṭanna a ni. Kum 20 vel dawn hnuah David Darlong chuan he hla mawi tak hi rawn thar thawh lehin, hla mawi tawh sa kha tunlai takin a mawina belhchhah turin a rawn sachhuak leh thei a ni.

A sang pathum zingah Vanzara leh Sabina

Zaithiam hming chher mek Vanzara chuan hma rawn sawn zelin, a music video mawi leh hmuh nuam tak "I mawi ngei e" chu pahnihnaah a rawn lanpui. RZ Chhakchhuak hla phuah hi pakhatna ni thei turin dinhmun ṭha takah a ding mek; he hla belchiang duh tan MDM YouTube channel-ah ngaihthlak theihin a awm.

Pathumnaah hian Sabina Somi rawn langin, chart-ah "Ruahpui Vanawn" a sur chho zel a, a sur chhoh zel pawh a rinawm hle. He hla hi Zoram rimawia mikhual lo tak Peka Fanai phuah a ni a, music pawh hi amah vekin a buaipui bawk. Hemi rual hian mawi taka a rawn chhuah theihna tura mi pawimawh erawh Sabina hi a tih loh theih loh a, a che vel a zangkhaiin video simple leh hmuhnuam takah an rawn chhuah thei hi an fakawm hle.

Chart-ah hmel thar

HT Lalthanzami hla "Nang leh kei" chuan pen hniha hma rawn sawnin, palinaah a rawn lang a, Ngurthansanga'n thla hmasa lawka a tihchhuah "Ṭhal awiin Leltepa'n" pawh chart a hmasawn chak ber zinga mi rawn ni chhoin a sang panga zingah a rawn invawrh leh der tawh a ni.

Em es Hauzel, Slickjiv leh Lalrinmawia Chawngthu-te chu chart-ah an la cham chhunzawm zel a, Christina Lalmuanawmi leh Asanga Project ft Ruatpuii-te chu chart a rawn lang tharte an ni.