Zayn leh Selena inkar a vul chho zel dawn em?

Selena Gomez hi khawthlang celebrity mai ni loin, khawvel huap pawha huhang ngah ber pawl niin, chanchin ṭha lam emaw ṭha lo lam emaw pawh nei se mipui ngaihven a ni nghal thei zel. Tunhnai lawkah Kylie Jenner lehpelin IG-a followers ngah ber a ni mek a ni.

Selena hian kumin phei chu social media chawk buai thei khawpin boruak a rawn nei hat a; a bialpa hlui Justin Bieber-a nupui Hailey nen drama lian tak an neih hnuah, inhriatthiam tawnna sang tak nen an inkar boruak hi a dai chho ṭan mek tihah Zayn Malik nen sawizawm an ni zui leh a, New York khawpuiah chawhlui an kildun lai hmuh an nih leh tak avangin Selena boruak hi a dai tak tak thei lo a ni ber mai.

Selena leh Zayn-te hian an pahnih chanchin hi a ṭha zawngin an insawitawnsak fo ṭhin a, ṭawngkam chhiaa inbe ngai lo na na na chu intawn hun an neih ni a lo herchhuak leh a, hetia thawm an neih tak hnuah Zayn farnu pawhin Selena chu a ngainat thu leh, a duh thu a lo sawi lang ve bawk.

Selena Gomez leh Zayn Malik inkar thuthang a rawn darh aṭang khan, thil an la thutak dun hle a. One Direction member hlui hian Selena chu IG-ah follow zui nghalin, mi 18 lek a follow zingah Selena hming hmuh tur a awm zui a ni.

An hun hman chungchang sawiin, "Hun ṭha tak an hmang dun thei a, inpawhna ṭha tak an nei. Zayn hi Selena mipa duh chi tak a ni a, eng nge an hmabak ni zel dawn tih pawh hriat a duh a ni," tiin report chuan a tarlang.

Heng thuthang karah hian kum 2012-a Selena an kawmnate pawh rawn darh thar lehin, Selena chuan Malik chu a mipa ngainat chi tak a nih thute a lo sawi tawh a, DM kaltlanga inbe chhoin, ṭhian kawm inang leh inanna dang tam tak an neih thute a lo sawilang tawh a ni.