Super Mario a che 'super' ṭiah ṭiah e!
Kum 1983 khan he chanchin chhiartu tam zawk hi chu an la piang lo maithei, hemi kum hian khawvela game lar ber pawla chhal ngam Super Mario arcade game hmasa ber chu tlangzarh a ni. Kum hnih hnu 1985 khan Famicom chuan Japan-ah Super Mario Bros hi tlangzarh thar lehin, tui dawt/zem siamtu Mario leh a unaupa Luigi-te'n Princess Toadstool chhanchhuah tuma chona hrang hrang an paltlang a ngaihna hi khawvel huapa game lar, hralh hnem pawl leh, khelh hlawh ber te zingah rawn invawrhin, a bikin kum 2000 hma lama piang mipa naupang he game khel lo hi an vang viau ang le.
He game ngei mai chu film-ah siamin, kar liam ta chhunga box office aṭanga sum hailut hnem ber leh, video game adaptation film-a hlawhtling berah a rawn inhlangkai nghal a ni.
Easter chhungin a che ṭha
He Nintendo video game lar tak hi film-ah chan tirin, a aw thawhtute pawh an duhtui hle. Chris Pratt, Anya Taylor-Joy, Jack Black, Seth Rogen leh milar ṭhahnem tak intelkhawmna hi a nep thei lo hrim hrim a; a hlawhtlin zia hahipin kan sawi lo thei lo, a chhan chu a hlawhtlinna chan hi a ropui em a tin ni. Khawthlang ramah hlut a hlawhin Easter kar bikah film tlangzarh tawh azawnga hlawhtling ber pawlah a rawn invawrh thei a ni. Super Mario hian game-a a chetdan ang bawkin beiseina tam tak a rawn zuan khum a, record hrang hrangte rawn siam thar bawkin, Good Friday leh Easter inkar (ni thum chhung) khan USD mtd 146.4 lalutin, ni nga chhung lekin USD mtd 204.6 lai a hailut thei!
Video game film-a chhuah zinga sum hailut hnem ber ni ṭhin "Sonic the Hedgehog 2" (USD mtd 72.1) pawh a khum chiang hle a, a sum lakluh belhkhawm chu Mario hian kar khat tling loah a khum der tawh a ni.
Super Mario hian kumina film tlangzarh kar bika sum hailut hnem ber ni ṭhin "Ant-Man and the Wasp: Quantumania" (USD mtd 106.1) chu lehpelin bung thar a rawn kai a, Easter kara sum lakluh tam lamah "Furious 7" leh, "Batman v Superman: Dawn of Justice" chiah phak loin pathumnaah a awm.
Rampawnah a hlawhtling
Khawvel ram hrang hranga market 70 aṭangin USD mtd 173 lalut bawkin, tihian khawvel puma a sum lakluh belhkhawm chu USD mtd 377 lai a tling tawh. Video games-te hi film-a anga an chhuah hian a hlawhtling mawh hle a, mahse Super Mario erawh a dan a dang tlat; he mangchhia duhawm loh tak hi Super Mario chuan a rawn thaichhe chiang hle.
Nike Air Jordan hlawhtlin chhan?
Ben Affleck channa "AIR" hi Nike-in Basketball legend Michael Jordan an lakluh dan tarlanna, khawvela pheikhawk lar ber leh hlawhtling ber pawl Air Jordan ṭhanlen dan chanchin chu mipuiin an hlut ang reng hle a, USD mtd 14.47 lalutin palinaah a rawn lang. Keanu Reeves channa "John Wick: Chapter 4" chuan USD mtd 14.6 lakluh belhin pahnihnaah a lungawi a ngai a, a sum lakluh belhkhawm hi USD mtd 269.1 a tling tawh a ni.
Kar hmasa lama pakhatna "Dungeons & Dragons: Honor Among Thieves" chu pathumnaah tla thlain, USD mtd 62.2 a lalut tawh.
"Scream VI" pawh a thawm a zawi tawh hle a, panganaah a la inhamtangin USD mtd 3.3 vel a lalut a ni.