American Horror Story-ah Kim K leh Emma Roberts inlan dawn

Kim Kardashian chu lemchan khawvelah a rawn inlan dawn a, Ryan Murphy kutchhuak "American Horror Story" season 12-ah season 6 lama a hmel kan lo hmuh tawh Emma Roberts nen inlan tura tihchian an ni ta.

Kim K leh Emma Roberts-te hi "AHS"-ah an inlan dawn tih chanchin a darh veleh an pahnih hian Instagram-ah an phur tawh zia rawn tarlang nghalin, "Rock-a-bye, Baby" version post lo siamin "dinhmun derthawng takah kan ding dawn a ni," tiin film-a an role tur hrilhlawkna ang reng tak chu an rawn tarlang zui bawk.

"AHS" co-creator Ryan chuan khawvela TV star hlawhtling leh, lar ber pawl tiha chhal ngam Kim K an lalut thei chu a lawm thu a sawi. "AHS" hi kum 2011 aṭanga chan ṭan niin, season 11 thleng chan a ni tawh. He series hi thla hrang lam ngainatute chuan an hlut hle a ni.

Kim K hian eng role nge a chan dawn tih puanzar a la ni lo a, "Last Man Standing", "How I Met Your Mother","Drop Dead Diva" leh, "CSI: NY"-ahte lo inlan tawhin, "AHS" season 12-ah hi chuan lead role chang tura beisei a ni thung.