billboard; thununtu Morgan Wallen

Country music hmel thar tiha kan lo sawi fo ṭhin, Morgan Wallen chuan Billboard Hot 100 leh 200 album chart-ah pakhatna dinhmun hauh ve ve in, kar liam ta chhung khan billboard chart te a thunun hneh hle.

Morgan Wallen hmelhriat rawh le

Zaithiam leh hlaphuah thiam, Morgan Wallen hian singing competition lawm hlawh tak, The Voice Season 6 aṭangin hming a chher ṭan. Intihsiakna tir lamah Usher chuan enkawl mah se, Adam Levine chuan a member ni turin a lalut chhunzawn leh a ni. Hemi season hian playoffs paltlang zo loin, intihsiak zawh hnuah Panacea Records hnuaiah inziaklut nghalin, kum 2015 khan a EP hmasa ber "Stand Alone" chu a tichhuak.

Kum 2016-ah Big Loud hnuaiah insawn lehin, a music zinkawng chu her danglamin a awm chho ṭan a ni. Big Loud aṭang hian a album hmasa ber " If I Know Me," chu kum 2018 khan a tlangzarh a, Billboard Top Country Albums chart-ah pakhatna a nihpui thei a, mi nawlpuiin an hre ṭan.

Morgan tak tak a rawn lang

Wallen hian January 2021 khan a album pahnihna "Dangerous: The Double Album" chu tichhuakin, Billboard din ṭan aṭanga country album hlawhtling ber pawl a rawn ni nghal. Chart-ah a zawna kar sarih chhung pakhatna ni thei hmasa ber niin, mellung pawimawh tak a phun a ni. Kar 10 chhung (a zawn ni lo) pakhatna a ni a, Whitney Houston-i'n kum 1987-a a tihchhuah 'Whitney' tih album hnua he dinhmun sang thleng leh thei hmasa ber a ni bawk a, a album pahnihna a tihchhuah aṭang hi chuan artist ṭha huangah chhiar tel theih a ni ta.

A album pathumna

Wallen-a album pathumna "One Thing at a Time" hi March 3 khan tlangzarh lehin, hetah hian track 36 zet a khung a, tlangzarh karah equivalent unit nuai 5 chuang zet a hmuchhuak thei a, kumin chhunga unit hmuchhuak hnem ber ni mekin, Taylor Swift - Red (Taylor's Version) album hnua country album hlawhtling ber a ni bawk. Hei mai a la ni lo, he album-a track 36-te hian stream mtd 500 dawn a nei tling tawh a; kan la sawi zo lo, heng track 36-te hi Billboard Hot 100-ah lanpui vek bawkin, track 27 lo lanpui tawhtu Drake a record dinglai chu a rawn khum bawk avangin sawi ropui leh vak dan tur a vang tawh viau a ni.