Jungkook, Justin leh a chhehvel

BTS member zinga naupang ber, Jungkook chuan recording nei turin Thawhṭanni khan Los Angeles-a thleng. Hetah hian Justin Bieber-a hlawhtlinna phena mi pawimawh tak pakhat Scooter Braun bakah JB-a thawhpui dang, Grammy Award-winning record producer Andrew Watt leh Cirkut-te nen hun an hman hona thlalakte an tarlan avangin JB-a nen hla thar nei ngei se ti tawk an tam tawh hle.

HYBE America CEO atana ruat thar Scooter Braun hian Justin Bieber, Ariana Grande, leh Demi Lovato-te a lo enkawl tawh a, Cirkut hi hla lar tak tak heng–The Weeknd 'Starboy', Miley Cyrus 'Wrecking Ball' , leh Sam Smith and Kim Petras te'n Grammy an lakpuina hla 'Unholy'-ah te a meizanghlaptu pawimawh a ni a, Andrew Watt hi Miley Cyrus, Post Malone, Sam Smith leh Ozzy Osbourne-te a lo thawhpui tawh a, Jungkook-a'n studio lama a hun hmanpuite hian sulhnu an ngah tawhin an hrawl hle a ni.

Justin nen thawkdun tura sawi rik an nih rual hian, Jungkook hian a solo album hmasa ber tihchhuah tumin hma a la mek tih thuthang pawh a darh chiam bawk. Nikuma Bangtan member te'n chawlhlailawk an puan hnuah mimal thil ṭheuh buaipuiin hun an hmang a ni. BTS lama a bandmate, J-hope 'Jack in the Box' , Jin 'The Astronaut' , RM 'Indigo', Jimin 'FACE', leh SUGA 'D-DAY', te chuan hla thar an tihchhuah hnuah, a ṭhiante hnung a zui mai hi a rinawm a, single leh collaboration eng emaw zat a tihchhuah tawh hnuah album lam a hawi a nih pawhin a mak lo ang.

South Korean boy band BTS larzia sawi nawn a ngai tawh lo a, khawthlang ramah pawh an tlak nat tawhzia pawh sawi ngai loa chiang a ni. BTS member tin mai hian A-list artist thawpui kawngah harsatna an nei dawn lo a, ṭhenkhat chuan anni zawk hi thawhpui chakin an pan hial hun pawh a thlen vat a rinawm a ni.