Time's 100 Most Influential People-ah SS Rajamouli leh Shah Rukh Khan lang

Time's magazine-in kumtin khawvela huhang ngah zual mi 100 an thlanchhuahna '100 most influential people' chu nimin khan tihchhuah niin, India aṭangin Bollywood khawvela hming dai tawh ngai lo tur leh, kum li dawn lemchan khawvel a chawlhsan hnua kumina Indian film hlawhtling ber "Pathaan" nen ropui taka lo thochhuak Shah Rukh Khan leh, Tollywood movie hlawhtling pahnih - 'RRR' leh 'Baahubali' hlawhtlinna phena mi pawimawh; an franchise director SS Rajamouli-te chu list-ah hian India ram aiawhin an lang.

Kumin hian mi 100 ni loin, hming 96 chiah chhawpchhuah an ni a, a bak mi pali chu kumin chhunga puan chhunzawm leh tura ruahman a ni. "Technology lama hmahruaitute aṭanga political leader, industry-a mihrawlte aṭanga zaithiam, innovator leh influencer-te huamtel tir vek an ni," tiin Magazine chuan a tarlang.

Time's 100 Most Influential People list-a hming langsar zual zingah Twitter CEO- Elon Musk, tunlai thiamna Artificial Intelligence lama sulsutu- OpenAI founder Sam Altman, US President 46-na Joe Biden, British Lal- King Charles, Syria mi swimmer leh activists - Sara Mardini leh Yusra Mardini, supermodel - Bella Hadid, leh pop lalnu- Beyonce-te hming pawh hmuhtur a awm. Lehkhabu sawi zui hlawh tak 'Satanic Verses' bakah, 'Midnight’s Children' ziaktu lar, tunhnaia beih a tawh avanga a mit khing lam del zui ta - Salman Rushdie leh, YouTube-a individual content creator zinga subcriber ngah ber Mr. Beast-te hming pawh a lang a ni.

Infiammi zingah World Cup nomawi chawi hlim, Argentina ram captain ni bawk Lionel Messi, PSG lama Messi khelhpui leh, footballer ṭhangduang Kylian Mbappe, Polish professional tennis player Iga Świątek leh, American football quarterback Patrick Mahomes-te an lang bawk.

Entertainment huangah, King of Rock and Roll Elvis Presley lema hnehsawh taka chang Austin Butler kan hmu a, Mexican actress chuai thei lo Salma Hayek, Creed star Michael B. Jordan, rimawi huanga thawm ngah ber pawl Doja Cat leh, HBO series hmuhnawm 'The Last of Us' star Pedro Pascal-te hming pawh a lang a ni.

Kum 1999 aṭang khan American magazine chuan he list hi tichhuak ṭanin, Time 100 alumni leh international writing staff te'n an thlang hmasa phawt ṭhin a ni. List hi uluk taka thlitfim an nih hnuah Time editor chuan list hnuhnung ber hi tichhuak lehin, commemorative gala-ah lawmpuina an hlan ṭhin.